Donayre hulipan ni Torre

Sunday, February 12, 2012

TUNGOD sa wa matinong rason, di makaaway karong Biyernes si Vaugh “The Spawn” Donayre sa gipaabot ug gikahinaman nga Fight Ground Championship 3 sa Mandaue City Cultural and Sports Complex.

Niini, ang mixed martial arts champion (MMA) nga si Victorino Paulino Torre Jr. sa Bacolod City maoy mopuli ni Donayre. Ikasangka ni Torre sa main event fight si Romilo “Mad Dog” Esfra sa Mandaue.

Have something to report? Tell us in text, photos or videos.

“Way problema, bisan kinsa. Maayo nuon taga laing lugar. Di ko magpakauwaw sa taga Mandaue. Lig-on man tuod ni siya pero break ni nako,” matod ni Esfra sa dihang nahibaw-an nga lain na ang iyang makontra.

Gawas sa Esfra-Torre mainer, gipaabot usab nga madugoon panagsangka nila ni Alde “Pitbull” de Zosa ug Adamson “The Assasin” Torbiso sa Team Insider Manila.

Kagahapon niabot na si Torbiso ug anhi na sa Sugbo ipahigayon ang iyang katapusang hut-ong sa pag-ensayo.

Ang promoter nga si Joseph Lanuza sa Back Fist Promotion mibutyag nga ang FGC 3 ubos sa pagsuporta sa Pacific Xtreme Combat.

Matod ni Lanuza nga ang tanang walo ka supporting bouts ning maong promosyon magsilbi usab nga elimination round sa PXC.

“Ang modaog sa walo ka mga preliminary bouts, dunay chance nga makaaway didto sa Kaulohan sa PXC,” matod ni Lanuza.