Human ni Bradley, Pacman moretiro?

Monday, February 13, 2012

GIPABUHAGAY ni pound-for-pound champion Manny Pacquiao nga posibleng katapusan na niyang away ang iyang pagpakigbatok kang American Timothy Bradley karong Hunyo 9 sa MGM Grand sa Las Vegas, USA.

Nidugang si Pacquiao nga posibleng dili na sab gyud mahitabo ang labing giatngang away sa kasaysayan sa boksing diin kaparang niya si American Floyd Mayweather Jr.

Have something to report? Tell us in text, photos or videos.

Sa interbyu sa ABS-CBN, gipasabot ni Pacquiao nga dili na maayong tan-awon nga moaway siya ibabaw sa ring karon nga iya nang gidawat ang tanyag sa Simbahan nga mahimong Bible ambassador.

Matod ni Pacquiao nga magtutok na lang unya siya sa iyang mga plano sa pulitika ug pagbasa sa bibliya.

Sa miaging buwan, gipabuhagay ni Pacquiao nga nabag-o na ang iyang pagtuo ug gibiyaan na niya ang tanan niyang bisyo lakip na ang pagsugal, unom, ug pambabaye.

Sa laing bahin, si Pacquiao nakaseguro nang daan og $25 millions nga ganti – labing dako niyang madawat --sa iyang pagpakigbatok kang Bradley, kinsa makabulsa og $5 millions, labing dako sab niyang ganti.

Sa iyang katapusang away diin midaog siya sa ikatulo nilang panagharong ni Mexican Juan Manuel Marquez, si Pacquiao nakadawat og ganti nga $22 milllion, wala pa’y labot niini ang iyang bahin sa pay-per-view, gate attendance, ug international broadcast rights.

Kon mokita og dako ang pay-per-view, gituohang moabot og labing ubos $40 millions ang makuha ni Pacquiao.