Welcome home, Champ

Monday, February 13, 2012

SA edad nga 22, natuman na gyud ang pangandoy ni Johnriel “Quadro Alas” Casimero – ang mahimong boxing world champion.

Karong adlawa, moabot si Casimero gikan sa Argentina dala ang katam-is sa kalampusan nga naghatag og dungog dili lang sa iyang kaugalingon kon dili hasta sa kinatibuk-ang yutang Pilipinhon.

Have something to report? Tell us in text, photos or videos.

Ang Team Casimero, nga gilangkuban nila ni promoter Sammy “Don King” Gelloani ug trainer Pingping Tepora, nakatakdang moabot karong alas 3:55 minutos sa Mactan International Airport sakay sa Qatar Airways.

Gikan sa airport, ipahigayon ang usa ka motorcade nga giandam sa International Phar­maceutical Inc. (IPI) gym alang kang Casimero, kinsa maoy bag-ong kampiyon sa International Boxing Federation (IBF) light flyweight title.

Human sa motorcade, adunay ipahigayong dinner press conference mga alas 6:00 sa gabii sa Baseline Restaurant.

Si Casimero, kinsa adunay 16-2, 10KOs nga rekord, unang nanuktok alang sa world title niadtong Marso 26 sa miaging tuig alang sa IBF flyweight title sa Johannesburg, South Africa.

Apan niadtong higayuna, gipakyas siya ni Moruti Mthalane pinaagi sa 5th round TKO.

Mibangon si Casimero ning maong kapak­yasan pinaagi sa 2nd round TKO nga kadaugan batok kang Roemart Sentillas niadtong OKtubre 15, 2011 sa Hoops Dome sa Lapu­-Lapu City.

Human niini, sayod si Casimero nga posibleng makakuha siya’g laing oportunidad alang sa world title pinaagi sa paninguha ni Gelloani.

Grabe ang iyang paningkamot sa ensayo hangtod nga niabot gyud ang oportunidad nga iyang gihuwat.

Niadto lang Dominggo sa Buenos Aires, Argentina, niposte og 10th round TKO nga kadaugan si Casimero batok sa beterano ug dekalidad nga si Argentinian Luis Lazarte (29-11, 18KOs) aron angkunon ang IBF light flyweight title.

Nahimong kontrobersyal ang away gumikan sa nahitabong riot pagkahuman gianunsyo ang resulta sa binukbokay.

Gibato ang Team Casimero og nagkadaiyang mga butang lakip na niini ang mga lingkuranan unya daghang Argentinian fans ang misaka sa ring ug gipangsumbag ang mga Pinoy.

Ang referee sa away gikatahong nahidangat sa ospital.

Ang Team Casimero adunay escort nga mga pulis sa ilang pagbalik sa hotel nga ilang gisak-an.