Pineda, Rider of the Year sa 2011
-A A +ASunday, February 26, 2012
SAMA sa gituohan, nadaog gyud ni Kimboy Pineda sa Tagum City ang “Rider of the Year” award sa 2011 edition sa grandiyusong MS Motosuit Motocross Series Awards Night sa miaging gabii sa Teatro Casino sa Waterfront-Cebu City Hotel and Casino sa Lahug, Cebu City.
Si Pineda mao pa lang ang ikaduhang dili taga Sugbo nga nakadawat ning maong pasidungog sa unom ka mga tuig nga kasaysayan sa lumba.
Dili sab gyud ikahibulong ang kalampusan ni Pineda kay siya gyud ang midominar sa pro ug expert categories.
Alang kang Pineda, dili niya hikalimtan kining maong kalampusan kay mao kini ang iyang kalipay isip usa ka rider.
Sa iyang mensahe, emosyunal nga misaysay si Pineda nga mibiyahe gyud siya dinhi bisan namatay ang iyang pag-umangkon sa miaging semana aron personal nga dawaton ang pasidungog.
Gipabuhagay sab ni Pineda ang iyang pasalamat kay bisan dili siya taga Sugbo, gihangop gyud gihapon siya sa mga Sugbuanon. Gawas sa iyang pamilya ug mga paryente, gihatagan sab ni Pineda og tipik sa iyang kalampusan ang dekalidad nga rider sa Sugbo nga si Jonjon Adlawan.
Gipasabot ni Pineda nga si Adlawan gyud ang nakaimpluwensiya ug nakadasig kaniya nga mokayod og maayo sa ensayo.
Human sa iyang mensahe, gipakpakan si Pineda sa mga ningtambong sa kalihukan nga naglakip nila ni Cebu City Sports Commission (CCSC) chairman Edward Hayco, SCOOP-Cebu president Bobby Inoferio, Borbon Mayor Butch Sepulveda, Dr. Andy Uy sa Reliance Motors, Daanbantayan councilor Malou Pepito, radioman Greg Senining ug motocross patron Joy Flores.
Ang series sa miaging tuig, nga gisuportahan sa Petron Philippines, milanat og siyam ka legs.
Ang ubang major awardees mao sila si intermediate king John Flores, three-time peewee champion BJ Pepito, back-to-back executive A titlist Jun Enriquez, perennial open enduro champion Donkey Sanchez, double champion Ray Quirol (beginners production and open enduro), top novice rider Cyril Tariman, executive B champ Roscel Gungob, executive C ruler Jerry Sicad ug mini class crown-holder Jogie Basco.
Gipatik sa mantalaang SuperBalita Cebu Pebrero 27, 2012.
Isports
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
