Migallen: Ang kontra ni Boom-Boom

KARONG hapon,  sa makausa pa ang Sportswriters Association of Cebu (SAC) mopasidungog na usab sa mga Cebu-based athletes nga nakapakita ug nakahatag og igong dungog sa Sugbo sa ilang tagsatagsa ka field sa natad sa paugnat sa kusog.

Usa kini ka special nga kalihukan sa maong pundok nga ipahigayon kausa sa matag tuig ug daghan na usab ang mga Sugboanong atleta o Cebu-based athletes nga napasidunggan na ning pundok sa mga sportwriters sa Sugbo. Taodtaod nga nagpaluyo niini mao ang San Miguel Corporation.

Napiling pinasidunggang dinapit sa maong kalihukan ang kanhing inilang basketbolista nga karon usa na ka commissioner sa Philippine Sports Commission (PSC) nga si Chito Loyzaga.

Gusto gyud unta nato nga makatambong sa maong pasidungog pero tungod kay aduna lagi kitay boxing coverage diri sa Tagbilaran City nga natumong usab karong adlawa, hinungdan nga di gyud ta makatambong.

Ngadto sa SAC nga gipangulohan ni John Pages, kolumnista sa Sun.Star-Cebu, ug kaubanan good luck na lang ug ngadto sa mga atleta nga nakadawat sa pasidungog, congratulations
and keep up the good work.

***********

Gibanabana nga moabot ngadto sa 20,000 ka mga boxing fans ang gituohan nga mohan-ok karong gabii sa Carlos P. Garcia Sports Complex aron pagsaksi na usab sa away sa local boxing hero nga si Rey “BoomBoom” Bautista kinsa makigbatok sa Mexicanong si Genaro Garcia sa usa ka non-title fight.

Sa wa pa sugdi ang tinimibangay kagahapon, si BoomBoom misugilon diri kanato nga wa gyud siyay kompiyansa niining awaya tungod kay beterano ang iyang kontra.

Pero paghuman sa tinimbangay, wa man tuod motagna og knockout si BoomBoom apan tan-aw
nako layo ray tulo ka round aning Garcia. Kay lagi mobo man, haom kaayo  siya sa jab ni BoomBoom ug gawas niini mora man og tubigon kaayo og tiyan.

Nisamot ang akong pagtuo nga kadiyot ra kaayo ning awaya tungod kay abi ninyo og unsa, overweight og four pounds si Garcia kay imbis 128 lbs. ang awayan niabot man og 132 lbs. Si Bautista kondisyon kaayo og mitimbang kinig 127.5 lbs.

Si Michael Aldeguer, ang manager ni Bautista uban sa iyang amahan nga si Cebu boxing patron Tony Aldeguer, kay di lagi title fight, mipasumbingay nga bisan og mo-reduce lang og duha ka pounds, mosugot sila bisag way penalty. Buot ipasabot nga pareho og gidak-on og glove nga gamiton ang duha kay dili lagi title fight.

Ang nakapaduda nakog maayo kay imbis magpa-reduce unsang pagkaunsaa nga matod pa sa
usa nato ka kauban sa buhat ang mitug-an nga ila man hinuon kining nakit-an sa usa ka restaurant nga nikaon.

Pinaagi sa interpreter, ila na lang kunong dawaton nga pagamiton sila og dako nga
glove ug di na lang sila magpa-reduce. Kining maong fighter niabot diri sa Bohol mga upat na ka adlaw nga way kuyog nga trainer kay lagi nasakit kuno.

Kon record lang ang basehan, mahulagway nga beterano ug maayong laki nga boksidor kini si Garcia kay tiaw mo bay 38 ka daog ug walo ang pildi. Unya ka walo na makaaway og mga kanhi world champions.

Pero mora man og lahi ang atong nakita kagahapon. Ambot og nagpagoryo-goryo lang kaha ni si Garcia o kaha mao gyud ni ang iyang style ug kinaiya. Mahibaw-a ra ni nato karong gabii kon kinsa gyud ni si Garcia. (junmigs0622@yahoo.com)