Migallen: ALA boxing, Roger Yap

SA NAHITABO niadtong Sabado nga naghatag og lama sa imahe nga ilang giampingan, I’m quite sure nga naleksyon na gyud ang Ala Boxing Promotions.

Karong umaabot nga Marso 24, aduna na usab silay boxing promotion diha sa Waterfront Hotel and Casino-Lahug diin depensaan ni AJ “Bazooka” Banal ang iyang WBO Asia Pacific bantamweight title batok sa laing Mexicano nga si Raul Hidalgo.

Sa atong pakisusi sa boxrec.com, atong nasigpatan nga adunay duha ka Raul Hidalgo nga
narehistro isip boksidor. Ang usa adunay record nga 16-5, 12 KOs samtang ang laing Raul Hidalgo naghambin og 0-1 nga baraha.

Natural ang legitimate contender nga Hidalgo nga may 16-5 nga record maoy ikontra ni Banal ug dili kining hawsyaw nga Hidalgo . Sa dihang gipangutana nga basin og masundan unya ang nahitabo sa Tagbilaran City niadtong Sabado, si Michael Aldeguer, presidente sa Ala Boxing Promotions, ang milingolingo nga daw sa nakatilaw na og tagam ug
mipasalig nga ila na gyud kining i-double check.

Ning mga adlaw nga lab-as pa sa ilang hunahuna nga gipadad-an sila og di mao nga Genaro Garcia nga maoy ikontra ni Rey “BoomBoom” Bautista  mora og aduna pa silay phobia. Busa, way angay ikabalaka, kay careful na kaayo sila. Tiaw  mo bay, gawas nga di mao ang gipadala, morag kadudahan pa kon boksidor ba gyud tong tawhana.

Sa pagkakaron, gilihok na sa kampong Aldeguer ang pagpasaka og kaso batok sa ilang gikasabot didto sa Mexico nga si Hugo Correa nga hangtod karon di na gyud nila makontak pa. Ambot og unsa kini ka tinuod nga kini si Correa black listed na diay kuno sa Mexico .

Si WBC presidente Jose Sulaiman, usa sa dakong haligi sa boxing commission sa Mexico , mipasalig nga iyang tinguhaon nga mapahamtangan og silot kini si Correa kay naghatag usab kini og bating dungog sa Mexico. Atong huwaton ug duna ba gyuy kalambuan kalabot niini, kay di lang ang kampo sa Ala maoy ilang gipakauwawan kon di morag nakaminos ni si Correa kanatong mga Pinoy.

******

Di na nato makita ang beterano og Sugboanong pointguard nga si Roger Yap nga moduwa sa PBA sugod karong adlawa. Si Yap, kansang playing time niminos na human si coach Tim Cone mao nay nidala sa B-Meg, gikuha sa San Miguel Beer sa alang sa AirAsia Asean Basketball League. Ang San Miguel Beer sister-team ra usab sa B-Meg.

Si Bobby Parks, headcoach sa San Miguel, nagtuo nga dako kaayo og matabang kaniya si Yap ilabi na sa backcourt area hinungdan nga iyang gisugyot nga kuhaon kini gikan sa B-Meg.

Ning maong kalambuan, si Yap makigkauban na unya sa lain pud nga Sugboanon nga si Junmar Fajardo. Karong Sabado subhan si Yap sa dihang mosulong ang Chang Thailand

Slammers sa Ynares Sports Arena. (junmigs0622@yahoo.com)