Spurs pildi sa Lakers

BISAN pa man og wa ang ilang star player nga si Kobe Bryant, gibuntog gihapon sa Los Angeles Lakers ang San Antonio Spurs, 98-84, kagahapon.

Ang higanting si Andrew Bynum mipuga og 16 puntos apan ang iyang 30 ka rebounds nga mitali og record sa karon nga season nga maoy pinakadaghan nga nahimo sa usa ka player sa usa ka duwa.

Si Metta World Peace mipakli usab og 26 puntos alang sa Lakers kinsa sa ikatulong sunodsunod nga higayon miduwa nga wa si Bryant tungod sa injury sa iyang walang bahin sa paa. Wa pa hibaw-i kon kanusa- gyud makaduwa og balik si Bryant.

Ang pagdominar ni Bynum sa rebound maoy nagpapas sa 25 ka rebounds nga kaduha mahimo ni Dwight Howard sa Orlando Magic ug Ersan Llyasova.

Nangulo sa Spurs si Danny Green nga may 22 puntos.

Midugang og 21 puntos si Pau Gasol nga may 11 ka rebounds alang sa Lakers kinsa 2-1 na nga wa si Bryant.

Ang Los Angeles aduna na lay pito ka duwa nga nahabilin ug sa kasamtangan nahiluna sa ikatulong dapit sa West conference.

Hinuon ang Spurs pabilin nga nag-una gihapon sa West tungod kay napildi man usab kagahapon ang Oklahoma City, sa LA Clippers, 100-98.

Sa laing duwa, ang New York Knicks nga anaa sa ikawalo ug katapusang lingkuranan sa playoffs sa Eastern Conference, mibuntog sa sikit nga kaatbang niini nga Milwaukee Bucks, 111-107.

Ang three-point shot ni J.R. Smith maoy milansang sa kadaugan nga nakapalig-on sa Knicks sa ikawalong puwesto batok sa Milwaukee Bucks nga nahimutang sa ikasiyam nga puwesto.

‘’If you are going to shoot the ball, make it - and he did,’’ matod ni Carmelo Anthony kinsa miyagyag og 32 ug 10 ka rebounds alang sa Knicks. ‘’He shot with confidence, he made it and put us up one and we were gone from there.’’

Mitapo usab sa duwa nga may 19 puntos si Tyson Chandler nga may 11 usab ka rebounds. Si Smith adunay 14.

‘’This is a game we had to have,’’ nagkanayon si Knicks coach Mike Woodson.

Si Monta Ellis mipabuto og 34 puntos, 22 gikan kang Brandon Jennings alang sa Bucks.

Bisan tuod og duna pay kahigayonan nga makasulod sa playoffs apan alang ni coach Scott Skiles nga makaapekto gyud og dako ang maong kapildihan.

"Not good,’’ Skiles said.’’ We expected to win the game. We didn’t win the game. If I feel good about that, I should get another profession.’’

Kon midaog pa, makatabla na unta sila sa Knicks sa overall standings.