Migallen: Series tapuson ugma?
-A A +ATaym Pa
Wednesday, June 20, 2012
KALIT lang nidag-om ug ningitngit ang paglaom sa inilog nga Oklahoma City Thunder sa nagpadayong finals series sa NBA 2012.
Human nila giharos ang defending champion Dallas Mavericks sa 1st round sa playoffs (4-0), dayon mipukan ni Kobe Bryant ug sa Los Angeles Lakers (4-1) sa second round ug ingon mipakauwaw sa San Antonio Spurs (4-2), ang Thunder nag-ong-ong na sa kapakyasan batok sa mas eksperiyensyado nga Miami Heat kinsa naglabaw na karon sa finals series, 3-1.
Sa kasaysayan, wa pay team sa NBA nga nidaog sa series human mabiyai og 1-3 sa best-of-seven finals ubos sa 2-3-2 format. Ang gamayng paglaom sa Thunder mao ang pagdaog sa Game 5 karong Biyernes aron birahon og balik ang series ngadto sa Oklahoma City alang sa Games 6 ug 7.
Sukad pagsugod sa playoffs, ang Thunder ka usa ra mapildi diha sa ilang korte ug kini sa Game 2 batok sa Heat. Buot ipasabot nga di basta-basta ang Oklahoma kon sila na gani ang mo-host kay didto sa ilang korte motaas ang ilang gana sa dinuwaan tungod sa abiba sa ilang mga dumadapig.
Sayod ang Heat niini, ug busa di gusto sila si LeBron James, Dwyane Wade, Chris Bosh ug kaubanan nga mobalik pa sa Oklahoma ang series.
Kon kini mahitabo, mora og mabawsan ang Thunder sa ilang gibuhat sa Spurs nga ilang gipildi og upat ka sunodsunod nga higayon aron sakmiton ang Western Conference title.
Ug karon sila na usab ang nabutang sa susamang sitwasyon and the Heat is determined to celebrate the title-clinching win diha mismo sa ilang korte ugmang adlawa, June 22 – ang paborito nakong adlaw. junmigs0622@yahoo.com
Gipatik sa mantalaang SuperBalita Cebu Hunyo 21, 2012.
Isports
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
