Manny daog
-A A +AThursday, June 21, 2012
SA video review sa World Boxing Organization (WBO), midominar gyud si 8-time world champion Manny Pacquiao batok kang Timothy Bradley sa mata sa lima ka international judges.
Natali sa scorecards sa judges mao ang 117-111, 117-111, 118-110, 116-112, ug 115-112.
Sukwahi kini sa nakita nila ni Duane Ford ug C.J. Ross nga parehong nagpadaog kang Bradley, 115-113, niadtong Hunyo 9 sa MGM Grand sa Las Vegas, USA.
Bugtong si Jerry Roth lang ang nagpadaog sa Pambansang Kamao sa Pilipinas.
Gitataw sa WBO nga dili nila puwedeng mabalit-ad ang resulta ug ibalik kang Pacquiao ang WBO welterweight title.
Nagkanayon si Pacquiao nga wala siya nasurpresa sa resulta sa review kay sayod siya sa sinugdanan pa lang nga siya gyud ang midaog sa away.
“Hindi na ako nagulat dahil alam na natin sa puso natin kung sino ang nanalo,” matod ni Pacquiao sa interbyu sa www.gmanews.tv.
Matod sa WBO nga ang ilaha ra gyung mahimo mao ang pagmando og rematch.
“The only thing we [the WBO] can do is authorize a rematch. We cannot go any further than that,” batbat ni WBO president Francisco Valcarcel.
Gipabuhagay ni Pacquiao nga andam sab gyud siyang makig-rematch kang Bradley ug masaligon siyang mabawi niya ang korona.
Hinuon giklaro ni Pacquiao nga mag-agad ra siya sa desisyon sa iyang promoter nga si Top Rank boss Bob Arum.
Sa laing interbyu, si Bradley mipabuhagay nang daan nga interesado siyang makig-away og balik sa fighting congressman sa Sarangani Province.
Gusto niyang ipamatuod nga dili surambaw ang iyang kadaugan.
Gipatik sa mantalaang SuperBalita Cebu Hunyo 22, 2012.
Isports
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
