Laing professional boxer namatay
-A A +ASunday, June 24, 2012
ADUNA na sa’y laing mangil-ad nga panghitabo sa natad sa boksing, taho sa www.abs-cbnnews.com.
Si Ermelito “Jog” Alim Jr., usa ka professional boxer sa Davao City, namatay niadtong Huwebes, duha ka mga adlaw human niya nadepensaan ang iyang Mindanao Professional Boxing Association (Minproba) super-bantamweight title sa Rosario, Agusan del Sur.
Human siya gideklarar nga mananaog pinaagi sa unanimous decision batok sa iyang challenger nga si Al Grumo, si Alim nawad-an og panimuot ibabaw sa ring.
Kini maoy labing unang depensa ni Alim sa korona nga iyang naangkon pinaagi sa third-round knockout nga kadaugan batok kang Ruben Santillanosa sa Rizal Park sa Davao City niadtong Marso 17.
Nasurpresa ang tanang kaila ni Alim nga mao na diay kini ang katapusan niyang away.
Si Alim maoy ikatulong Pinoyng boksidor nga ningpanaw karong tuiga gumikan sa bun-og nga naangkon niini sa pagpakig-away ibabaw sa ring.
Niadtong Pebrero, si Karlo Maquinto, 21, namatay pipila ka mga adlaw human sa iyang away batok kang Mark Joseph Costa.
Gipatik sa mantalaang SuperBalita Cebu Hunyo 25, 2012.
Isports
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
