D’Jango Bustamante, Bata Reyes gisubhag kadaugan

GIPANGULOHAN sa magkumpareng sila si Efren “Bata” Reyes ug Francisco “Django” Bustamante ang mga Pinoyng nasubhan og kadaugan sa miaging gabii sa pagsugod sa World 9-Ball Championship sa Doha, Qatar.

Ang gitawag sab og The Magician nga si Reyes yanong milampornas kang Philipp Stovanovic sa Croatia, 9-3, sam­tang si Bustamante milupig kang Taiwanese Lo Li Wen, 9-6.

Ang ubang mga Pinoy nga midaog sab mao sila si Carlo Biado, Roberto Gomez, Jundel Mazon, ug dili pa kaayo iladong si Joyme Vicente.

Gilampornas ni Vicente si Mohammad Berjawi sa United Arab Emirates, 9-4, gilupig ni Gallego si Sundeep Gulati sa India, 9-6, gibuntog ni Mazon si Chris Melling sa Great Britain, 9-7, samtang gilubong ni Biado si Rajandran Nair, 9-1.

Sa laing bahin, tulo sa upat ka mga Pinoy nga nabun­yagan og kapildihan nagpabilin pang buhi human nila gipangbuntog ang ilang tagsatagsa ka kontra sa loser’s bracket kagahapon.

Gipangtumbok mao sila si Elvis Calasang, Raymond Faraon ug Joven Alba.

Si Oliver Medenilla maoy labing unang Pinoy nga na­namilit human siya nakatilaw og laing pilde.

Sa ikatulong adlaw sa kompetisyon, mopakita na’g aksyon ang ubang mga pambato sa Pilipinas nga sila si kanhi No. 1 Dennis Orcullo, kanhi Ron­nie Alcano ug kanhi World 10-Ball Lee Van Corteza.