Trick shot show sa J Center Mall

DASOK sa makalingaw, makapakaging ug kulbahinam nga dumbol sa billiard ang ma­saksihan sa “Rack Up a Victory” Gospel Trick Shot Show World Tour nga ipahigayon karong Hunyo 27-29 matag alas 4:00 sa hapon sa J Centre Mall sa AS Fortuna, Mandaue City.

Mao kini ang gipabuhagay sa mga nagpa­siugda nga sila si Mike Massey, Tom “Dr. Cue” Rossman ug Steve “Father of Pool” Lilis ka­gahapon sa usa ka press conference sa Malakius Art Kaffe sa J Centre Mall.

Kon adunay Harlem Globetrotters ang bas­ketball, ang billiards aduna sa’y GTS Rack Team nga gilangkuban sa nahisgutang mga nagpasiugda.

Sila si Massey, Rossman, ug Lilis pulos superstars sa artistic pool nga adunay sanction sa World Pool Association (WBA).

Labing taas og naabot mao si Massey, kinsa 17 ka higayon nga nahimong world champion sa artistic pool.

Gipasabot sa mga nagpasiugda nga ila­ha kining gihimo aron malikay ang duwang billiards sa mga negatibong naglambigit niini sama sa pustaanay ug inom.

Labaw sa tanan, tinguha nilang mapakatap ang mga pulong sa Ginuo pinaagi sa pagduwa og billiards.

“We want to share the gospel of Jesus Christ in the pool of table. We do it because it wasn’t done before,” matod ni Lilis.

Giangkon sa mga nagpasiugda nga sama sa kasagarang mga bilyarista, nasinati sab nila ang pag-inom, pag-estambay, sa bilyaran, pustaanay ug hasta ang pagkasugamak sa paggamit og druga.

Apan gibiyaan kini nilang tanan ug nanghinaot sila nga mahimo nilang taytayan ang billiards aron mapakatap ang mga pulong sa Ginuo ngadto sa katawhan sa tibuok ka­libutan.

Gipaneguro nila nga malingaw gyud og maayo ang mga motan-aw sa kalihukan gu­mikan sa talagsaon ug makapabilin nga dumbol sa billiards.

Ang Pilipinas maoy labing unang gibisita sa grupo ug human niini, mobisita sab sila si China, Latin America, ug Egypt.