Kaduha sa 2013?

SA BOLANG kristal ni Top Rank boss Bob Arum, dili lang kausa kon dili kaduha gyud mag-away sila si 8-time world champion Filipino Manny Pacquiao ug American Floyd Mayweather Jr. sa sunod tuig.

Gipasabot ni Arum nga human sa away ni Pacquiao karong Nobiyembre 10 posible batok ni Timothy Bradley o Juan Manuel Mar­quez, hayan iya gyung lihukon nga magparang na ang labing sikat nga mga boksidor sa ka­libutan.

“Pacquiao will have another fight this year [November 10] and then look forward to maybe two fights with Mayweather next year,” matod ni Arum sa interbyu sa www.boxingscene.com.

Gipasabot ni Arum nga iyang gitarget ang 2013 gumikan sa kondisyon ni May­wea­ther nga naapektuhan gyud gumikan sa pagkabilanggo niini.

“I don’t think anybody on Mayweather’s side could commit him now for a fight because you don’t understand how debilitating it is living in prison, eating that kind of food,” pasabot ni Arum.

Si Mayweather nasestensiyahan og tulo ka mga buwan nga pagkabilanggo sa kasong pagpamun-og sa iyang kanhi hinigugma. Giserbisyuhan kini niya’g sugod human sa iyang kadaugan batok kang Miguel Cotto ni­adtong Mayo.

Inig gawas ni Mayweather sa bilangguan posible karong Septiyembre, nagkinahanglan pa kini’g igong panahon aron mabalikan sa saktong kondisyon.

Nakatakdang personal nga magkita kaga­hapon sila si Pacquiao ug Arum aron magplano sa sunod nga away sa Pambansang Kamao sa Pilipinas.

Ning pagsuwat, wala pa’y nakuhang detalye sa ilang panagsabot.

Kon madayon, posibleng ang pagpakigbatok kang Mayweather mao ang katapusang tahas ni Pacquiao ug moretiro na kini sa boksing.

Malaumon si Arum nga mahitabo na gyud kini sa sunod tuig.