Mikumpayot

MAKAKITA pa’g laing pagsidlak sa adlaw si WPA Player of the Year Dennis Orcollo human niya napukan ang ka­babayang si Raymond Faraon, 9-2, kagahapon sa pagtiklop sa group stage sa 2012 World 9-Ball Championship sa Doha, Qatar.

Ang kanhi mananagat sa Surigao maoy katapusang Pinoy nga nakaabante sa round-of-64 o knockout stage ning maong torneyo. Nakig-uban siya sa laing 11 ka mga Pinoy nga unang mi­abante.

Nag-una kang Orcollo sa knockout stage mao sila si Hall of Famer Efren “Bata” Reyes, Francisco “Django” Bustamante, two-time world champion Ronnie Alcano, Jundel Mazon, Lee Van Corteza, Roberto Gomez, Joven Alba, Carlo Biado, Elvis Calasang, Antonio Ga­­bica ug Marlon Caneda.

Sa sunod niyang tahas, si Orcollo makigparang kang Andrew Kong sa Hong Kong.

Si Caneda, kinsa usa ka OFW, mosagubang og malisod nga tahas kay ikaharong niya si Dutch player Nick van den Berg samtang si Corteza makigbatok kang Serge Das sa Belgium.

Ikasangka ni Gabica mao si Mario He sa Austria, ikaparang ni Calasang si John Morra sa
Canada samtang ikaatbang ni Biado si Japanese Naoyuki Oi.

Sa tanang Pinoy, si Alba maoy mosagubang sa grabe ka lisod nga tahas kay ikasangka niya si World 8-Ball champion Chang Jung Lin sa Chinese Taipei.

Si Bustamante makigbatok kang Taiwanese Fong Pang Chao, si Reyes makigharong kang Toh Lian Han sa Si­ngapore samtang si Gomez makigsangka kang Liu Haitao sa China.

Magparang sila si Mazon ug Alcano sa all-Pinoy showdown sa 1st round sa knockout stage.