Serenio yanong mipaundang ni Flores; duha ka YawYan daog sab
-A A +ASunday, July 1, 2012
NAGKINAHANGLAN lang og 45 segundos si James Joel “Spider” Serenio sa SOMA Kickboxing Club aron paundangon si Jafet “Smiling” Flores sa Komjukai Aikijutsu sa main event sa “Who Are You? Unleash the Unstoppable” mixed martial arts promotion sa Mandaue City Cultural and Sports Complex.
Pagsugod pa lang sa away, wala na’y giusik nga oras si Serenio ug giatake gyud dayon niya si Flores.
Segundos pa lang ang ninglabay sa 1st round, nakahigayon na si Serenio sa pag-alsa kang Flores ug dayo’g bundak niini sa sawog sa kanto nga bahin.
Unya human niini, brutal ug makusog nga mga kumo ang gipangbuhian ni Serenio ug giundang na sa referee ang away dihang wala na gyu’y ikasukol si Flores.
Gipasabot ni Serenio, kinsa karon pa lang miaway isip professional fighter, nga wala siya magdahom nga sayo niyang mapasurender si Flores gumikan kay sayod siya sa kapabilidad niini.
“Wa gyud ko mag-expect ato kay kahibalo ko nga maayo na siya moaway hilabi na sa ground. Ang akong pagtuo nga sa 3rd round, dad-on na gyud ko niya sa ground,” matod ni Serenio.
“Pero basin wala sila nakahibalo nga grabe sab ang akong praktis sa ground.”
Sa co-main event, impresibo sab kaayo si Geronimo “Daredevil” Etac sa YawYan Ardigma-Ceu sa iyang pagposte og 1st round TKO nga kadaugan batok kang Arnel Ylanan sa Bullet Muay Thai.
Nagsukdanay pa’g abilidad ang duha sa pagsugod sa away apan dihang nakakita’g tayming, miataki dayon si Etac ug iyang napaundang si Ylanan sa ika-1:13 minutos sa 1st round.
Sakop sa YawYan Top Team-Cebu, si Etac migamit una og backfist unya dihang naluag ang depensa ni Ylanan, pampatay nga knee strike ang iyang gibuhian nga miigo sa suwang ug nagpatumba kang Ylanan.
Giundang na dayon sa referee ang away.
Sa nag-inusarang kickboxing event, ang laing sakop sa YawYan-Cebu Top Team fighter Renan ‘Limbas’ Noblefranca milupig kang Leo ‘The Bull’ Rodrigo sa Bullet pinaagi sa unanimous decision.
Sa laing MMA fights, midaog sila si David Po batok Sherwin Pugales (decision), John Edu Torbiso batok Slotty Avila (TKO 2), Axel Torbiso batok Jay Paul Noquera (TKO 1), Moises Nudalo batok Rolando Nacua (TKO 1), John Dave Epile batok Jasper Berdin (tap out) ug Jun Abayle batok Edmar Sumbi (TKO 2).
Ang kalihukan gipasiugdahan sa SOMA Promotions ug gidumala ni Rolando Mendoza sa Games and Amusements Board.
Gipatik sa mantalaang SuperBalita Cebu Hulyo 02, 2012.
Isports
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
