Brooks magpabilin sa Oklahoma City
-A A +AMonday, July 2, 2012
MISANONG si Scott Brooks nga mopirma og bag-ong kontrata isip headcoach sa National Basketball Association (NBA) 2012 runner-up Oklahoma City Thunder.
Gikataho sa NBA.com nga molanat og upat ka mga tuig ang bag-ong kontrata ni Brooks, kinsa mao gyu’y nag-agak sa batan-ong puwersa sa Thunder hangtod nga nakaabot sila sa NBA finals.
Human ni-expire ang kontrata ni Brooks niadtong Hunyo, giprayoridad gyud sa Thunder nga papirmahon siya’g bag-ong kontrata.
Ang kontrata nakatakdang pirmahan karong adlawa ni Brooks. Gikataho nga nagbalor ang kontrata og $4 million plus matag tuig.
Gipasabot sa agent ni Brooks nga si Warren LeGarie nga dili sab sayon ang negusasyon una nagkasabot ang duha ka mga kampo.
“This is something very important to me and I think that’s what Scott [Brooks] decided. Clearly he feels that whatever went on was worth it to him because he ultimately is where he wanted to be,” pasabot ni LeGarie.
Sa sayo pa, adunay hugonhugon nga posibleng mokuha ang Thunder og mas beteranong coaches aron ihulip kang Brooks.
Lakip sa mga gipangkonsiderar mao sila si Phil Jackson ug Stav Van Gundy.
Hinuon sa ngadto-ngadto, nagkasabot ra gyud ang duha ka mga kampo.
Gipatik sa mantalaang SuperBalita Cebu Hulyo 03, 2012.
Isports
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
