Timex Run, Aug. 19
-A A +ATuesday, July 3, 2012
NAGKUMBOYA ang Timex ug Runrio Inc. sa pagdalit unya sa Sugbuanong runners og talagsaong kasinatian sa lumba sa dagan nga giulohan og Timex Run-Cebu.
Ang lumba, nga gipangandaman og insakto, gikatakda karong Agusto 19 ug manukad kini atubangan sa Cebu Normal University (CNU).
Sa taas nilang kasinatian sa pagsuporta og lumba sa dagan, ang Timex misaad og prestihiyusong pagpahigayon sa lumba nga gituohang pagaatngan na gyud sa Sugbuanong runners sa umaabot nga katuigan.
Lakip sa mga dagkong running events nga gisuportahan na sa Timex mao ang Ironman World Championships sa Kona ug Germany, New York City Marathon, ug London Marathon.
Daghan na sab nga dagkong running events dinhi sa nasod ang nasuportahan na sa Timex.
Usa sa angayang atangan sa Timex Run-Cebu mao ang partispasyon sa Team Pangilinan.
Ang magtiayong celebrities nga sila si Anthony ug Maricel Pangilinan mangapil sa lumba kauban ang ilang mga anak nga sila si Ella, Donny, Hannah, Benj, ug baby Salona.
Si Maricel, kinsa usa ka aktres, nagkanayon nga mibilib gyud siya sa paghangop sa mga Sugbuanon sa lumba sa dagan.
Iya kining nasinati dihang midagan siya sa Cebu City Sports Center oval kagahapon sa kadlawon ug nakita niya kon unsa ka daghang runners ang iyang gikadungan.
Ang Team Pangilinan sulod na sab sa upat ka mga tuig nga nalambigit sa lumba sa dagan. Naggiya kanila mao ang bantugang running coach nga si Rio Dela Cruz, kinsa usa sa mga nag-organisar sa Timex Run.
Ang local organizer nga si Ricky Ballesteros nagkanayon nga mga 3,000 ka runners ang ilang gituohang mangapil.
“We are targeting 3,000 runners but maybe we can increase to 5,000,” asoy ni Ballesteros.
Kini bisan pa man nga aduna kini kadungan nga lumba nga mao ang Cebu Doctors University (CDU) Run nga ipahigayon sa Mandaue City.
“Dili man seguro ta maapektuhan because we have different routes. Sa Cebu City unya sa Mandaue City sila,” pasabot ni Ballesteros sa press conference kagahapon sa Parklane Hotel.
Gawas sa ganting mga salapi, ang mga mananaog makadawat sab og Timex nga relo.
Alang sa dugang mga impormasyon, mahimong motawag sa 0928-2439643.
Gipatik sa mantalaang SuperBalita Cebu Hulyo 04, 2012.
Isports
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
