Walay tikas

HUMAN sa ilang imbestigasyon, ang Nevada state attorney general nipahibalo kang Top Rank boss Bob Arum nga wala sila’y nakitang detalye o ebidensya nga adunay surambaw ang split decision nga kadaugan ni American Timothy Bradley batok kang Manny Pacquiao sa miaging buwan.

Si Arum, kinsa maoy promoter nila ni Pacquiao ug Bradley, mao gyud ang nagsugyot nga mohimo og imbestigasyon ang Nevada kabahin sa kontrobersyal nga away.

Sa sayo pa, ang World Boxing Organization (WBO), nga maoy governing body sa giilugang world welterweight title sa away, mihimo sab og imbestigasyon.

Gamit ang lima ka beteranong judges, nasuta sa WBO nga angayan gyung midaog si Pacquiao pinaagi sa unanimous decision sukwahi sa resulta sa imbestigasyon sa Nevada.

“I’m not surprised at all,” matod pa sa manager ni Bradley nga si Cameron Dunkin kabahin sa resulta sa imbestigasyon sa Nevada sa interbyu sa Yahoo! Sports.

Apan supak si Arum sa resulta sa imbestigasyon sa Ne­va­da nga gihimo ni Dale Liebherr, attorney general chief of inves­tigations, ug gitugotan ni Nevada state attorney general Catherine Cortez Masto.

Matod ni Arum nga nagpagawas og resulta ang Nevada nga wala man lang gani mo-interbyu sa mismong tulo ka judges sa away.

“I have no reaction to it,” batbat ni Arum. “They spent a lot of time interviewing the referee [Robert Byrd] who had nothing to do with judging the fight and I didn’t see any interviews with the three judges who scored it. Wouldn’t you do that if you were looking into it?”

Apan mirason si Cortez Masto nga ang tulo ka judges sa away pulos gyud kuwalipikado ug wala sila’y nakitang angayang katahapan sa desisyon niini.

“Displeasure with the subjective decisions of sporting officials is not a sufficient basis for this office to initiate a criminal investigation,” pasabot ni Cortez Mastor.