Melligen andam na
-A A +AMonday, July 9, 2012
ANDAM na si Mark Jason Melligen alang sa pagbalik niya’g away karong Hulyo 16 diin ikaharong niya si Dondon Lapuz sa co-main event sa “Boxeo En Baliangao” boxing promotion sa Baliangao, Misamis Occidental.
Si Melligen katapusang nakaaway niadto pang Hulyo 1 sa miaging tuig diin nahisugamak siya sa 9th round knockout nga kapildihan batok kang Sebastian Andres Lujan sa San Antonio, Texas.
Ang maong away maoy katapusan ni Melligen ubos sa paggiya sa Top Rank Promotions ni Bob Arum ug ALA Promotions.
Dihang wala na siya gipapirma og balik og kontrata sa Top Rank, si Melligen midangop sa SGG Promotions ni Sammy “Don King” Gelloani ug wala sab siya napakyas.
Ubos sa pagdumala sa SGG Promotions, si Melligen nibalik sa ensayo ug nanghinaot nga makasugat pa siya’g dagkong oportunidad sa umaabot nga adlaw.
Gipasabot ni Gelloani nga ang pagpakigbatok ni Melligen kang Lapuz mahulog lang usa ka activity fight aron hinayhinay nga mahibalik ang siyento porsiyento niining kondisyon.
“Activity fight lang ni Mark Jason. Kon makondisyon na siya’g balik, plano nako nga paawayon siya’g balik sa U.S..” pasabot ni Gelloani.
Apan dili sab kini sayon nga tahas alang kang Melligen hilabi na kay bag-p pa ang siyang mibalik sa praktis.
Gipatik sa mantalaang SuperBalita Cebu Hulyo 10, 2012.
Isports
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
