Migallen: PBA com. angay sab imbestigahon
-A A +ATaym Pa
Tuesday, July 10, 2012
SA pagkatinuod lang, mora og gidak-an ra kaayo ko ning silot nga gipahamtang sa PBA commissioner’s office ngadto sa basketbolistang si Don Allado, ang sentro sa Barako Bull sa PBA.
Giangkon na ni Allado ang iyang kasaypanan, iyang gibasulan ug atubangan sa publiko siya nangayo og pasaylo.
Iyang gipasabot nga ang iyang gihimo bunga lang sa iyang kasagmuyo human mapildi ang Barako Bull sa Powerade Tigers sa knockout match sa niaging semana.
Human sa ilang kapildihan, kini man gud si Allado, kinsa 13 na ka tuig sa PBA, nag-post sa iyang Twitter account nga ang mga duwa sa PBA gimaniobra na daan ug gipangtiyupi. Kontrolado ang mga duwa.
Ang maong message nakahatag og kaguliyang di lang sa tibuok lega kon dili ngadto na sa publiko. Hinuon sa dihang nakabantay sa kasensitibo sa iyang gi-post dali kini niyang gi-delete ug nangayo siya og pasaylo.
Si PBA commissioner Chito Salud daling mihimo og imbestigasyon ug mipatawag ni Allado.
Gusto sa commissioner nga ihikyad ni Allado ang mga ebedensiya nga nagpamatuod sa iyang alegasyon.
Apan si Allado nangayo og pasaylo ug tukmang giangkon ang maong kasaypanan. Subli niyang gipadayag nga gibasulan niya og maayo ang iyang gibuhat ug iyang gipasabot nga bunga lang kini sa iyang kasagmuyo.
Pero bisan pa niini, naglagiting nga silot ang gipahamtang ngadto kaniya. Morag wa panumbalinga ang iyang pag-angkon ug pagpangayo og pasaylo.
Jobless na karon si Allado. Maghuwat pa siya og usa ka conference aron siya makabalik og duwa. Di sab siya kasiguro kon duna pa bay team nga mokuha kaniya labi na nga edad-edaran na pud siya.
Si congressman Mark Sambar sa Puersa ng Bayaning Atleta (PBA) ug ang grupo niini sa kongreso, wa sab kauyon sa dinalian kaayong pagpahigayon sa imbestigasyon.
Posibling ilang ipatawag si Salud kon duna ba silay igong basehan kon nganong ingon ana ka dako ang ilang gipamulta ug nganong suspensuhon pa man sab og usa ka conference si Allado?
Sa iyang pamahayag, si Kongresista Sambar nagkanayon “kaya nga po pinapatawag namin ‘tong investigation ay para mapakita sa lahat ng tao kung tama ba ang ginawang investigation ng PBA on themselves, kung tama ba ang mga proseso na ginawa nila, kung may due process, para mapakita talaga sa lahat ng tao ang transparency.”
Bitaw sab, kay basin og magpatuyang lang sab nya ni si Salud sa iyang gibati. junmigs0622@yahoo.com
********
Advance happy birthday ngadto ni Ecil Lebios kinsa magsaulog sa iyang ika-? nga adlawng natawhan karong Biyernes. Cheers!
Gipatik sa mantalaang SuperBalita Cebu Hulyo 11, 2012.
Isports
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
