Mindanao fighters mangabot na
-A A +ATuesday, July 10, 2012
MANGABOT na ugma ang fighters gikan sa Mindanao nga mopakita’g aksyon sa gikaintapang Ground & Pound VI: Invincible mixed martial arts promotion nga gikatakda karong Sabado sa Cebu Coliseum.
Sa ilang pag-abot dinhi sa Sugbo, usa lang ka pulong ang mohulagway sa bawon sa mga taga Mindanao – dominasyon.
Mangulo sa grupo mao si Lorde Rey “The Punisher” Yamit sa Butuan Extreme MMA, kinsa makigharong sa pambato sa Team UMMA Mandaue City nga si Mark “The Terminator” Araneta sa main event sa promosyon, nga gipasiugdahan ni YawYan Ardigma-Cebu CEO Master Benigno “Ekin” Caniga Jr.
Ilugan nila ni Yamit ug Araneta ang GNP Lightweight title.
Laing mga taga Mindanao nga mangabot mao sila si Rocky Tune “The Outlaw” Batolbatol, undefeated Jonathan “Mata De Leo” Esquierdo, Urtych “The Machine” Alarin, Israel “Fast Learner” Gomez, Carlo “The Masterpiece” Mabilin ug Brian “D Kid” Paciete.
Ang tanan pulos masaligon nga makadominar sa ilang tagsatagsa ka kontra.
Ang mga tiket sa promosyon, nga nagsaad og maduguon ug kulbahinam nga aksyon, nagbalor og P1,000 – VIP, P500 – Ringside, P300-Lower box ug P150 – 150.
Alang sa dugang mga impormasyon, motawag sa 255-8919, 2551405 o 09324524999.
Gipatik sa mantalaang SuperBalita Cebu Hulyo 11, 2012.
Isports
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
