Yamit mi-TKO ni Araneta

NASUGAKOD ni Lorde Rey “The Puncher” Yamit sa Butuan Extreme Mixed Martial Arts ang grabeng binukbokay sa iyang pagposte og TKO nga kadaugan sa pagsugod sa 3rd round batok kang Cebuano fighter Mark ‘The Terminator’ Araneta sa main event sa “Ground and Pound VI: Invincible” sa miaging gabii sa Cebu Coliseum.

Sa sayong bahin sa away, nagdilaab dayon ang aksyon ug nagpinaksitay dayon ang duha ka mga protagonista.

Agresibong miatak si Yamit pinaagi sa paglupad nga dala pambato ang tuhod apan gisugat siya sa left straight ni Araneta hinungdan nga sa maayong niyang pagkahapla.

“Pero wala ra man ko naunsa ato, na out balance lang gyud ko,” matod ni Yamit.

Human sa maong aksyon, agresibong miasdang si Araneta ug iyang naparugi si Yamit.

“Pero pagkahuman ato naigo gyud ko niya, nasakitan gyud ko sa tinuod lang,” pasabot ni Yamit, kinsa miangkon sa GNP lightweight title gumikan sa kadaugan.

Sa 2nd round, grabeng binukbokay ang gipakita nila ni Araneta ug Yamit apan masuta nga nakapabor gyud si Yamit sa maong sinukliay og mga kumo ug patid.

Sa dayong paghuman sa 2nd round, nayak-an ni Yamit si Araneta ug iya kining giksukmag og maayo. Maayo na lang kay nakalikay sa mas grabeng kastigo si Araneta sa pagbagting sa oras.

Gumikan sa kastigo nga iyang nadawat sagol sa grabeng kakapoy, wala na mosukol si Araneta sa pagbagting alang unta sa pagsugod sa ikatulong round

“Dili gyud puwede nga mouli ko sa Mindanao nga dili nako madala ang bakus. Ako gyung gisulod sa akong hunahuna nga dad-on nako ang bakus inig balik nako sa Mindanao,” matod ni Yamit.

Si Yamit misaka sa 8-3, 6KOs nga rekord samtang nahagsa si Araneta sa 5-3, 5KOs nga baraha.

Sa giatngan ug usa sa duha lang ka kickboxing boxing event, gilupig ni Renan “Limbas” Noblefranca sa Yaw-Yan ArDigma Cebu Top Team ang hugot niyang kaatbang nga si Steve “D’ Lightning” Sevilleno sa Team MUMMA-Manila pinaagi sa unanimous decision.

Sa kadaugan, naangkon ni Noblefranca ang YFCC bantamweight title.

Sa laing bahin, gipamatud-an ni Allan “The Dancing Man” Epile sa Soma Kickboxing Club nga bintaha gyud ang kusog sa batan-on dihang iyang gik-TKO sa 2nd round si Ben “Durex Warrior” Torbiso sa Durex Dragon Club sa “Founder vs. Founder” special attraction.

Usa sa mikawat og dakong atensyon sa promosyon mao ang 2TKO nga kadaugan ni sportswriter Lemuel Maglinte batok kang Zoren Pescador.

Gumikan sa grabeng bun-og nga iyang naangkon sa 1st round, si Pescador wala na mobarog sa pagbagting sa 2nd round.

Sa laing mga away, ningdaog sila si Theodric Batoon batok Kirk Florida (2 TKO), Brian Paciete batok Nelson Navarete (2 TKO), Carlo Mabilin batok James Roiles (UD), Roel Rosauro batok Israel Gomez (2 TKO), Keith Acapulco batok Ryan Salomon (2 TKO), Urtych Alarin batok Dodong Jagape (1 TKO), Kyle Co batok Jonamar Ma­caraya (2 TKO), ug Jonathan Esquierdo batok Ronilo Esfra (2 TKO).