Hinampakay na sa Wekaf '12
-A A +AWednesday, July 18, 2012
OPISYAL nang sugdan karong alas 10:00 sa buntag ang hinampakay sa 12th World Eskrima Kali Arnis Federation (Wekaf) Championship sa Cebu International Convention Center (CICC) sa North Reclamation Area sa Mandaue City.
Moabot ngadto sa 700 eskrimadors gikan sa 29 ka mga nasud ang mag-abot dinhi sa Sugbu alang sa torneyo.
Gawas sa host Philippines, naa sab ang defending champion United States, France, Oman, Scotland, Ireland, England, Spain, Puerto Rico, Canada, Belgium, Germany, Norway, Hong Kong, Hungary, Lichtenstein, Switzerland, Australia, New Zealand, India, Greece, South Korea, Vietnam, Sweden, Poland, Portugal, South Africa ug Indonesia.
Ning higayuna, malaumon ang Pilipinas nga mabawi pagbalik ang overall title ning prestihiyusong kompetisyon.
Matod pa ni Wekaf President Master Gerald Cañete nga gawas sa homecourt advantage, nakita sab gyud niya kon unsa ka grabe ang preparasyon sa mga representante sa nasod hinungdan nga malaumon gyud siyang molampos ang mga Pinoy.
Kahinumdoman nga dihang nag-host ang nasod sa torneyo niadtong 2008 sa Ayala Center Cebu, igo lang nalupig ang mga Pinoy og usa ka gold medal sa US.
Gawas pa sab, ang Pilipinas mao ang adunay labing daghang mga representante nga moabot og kapin sa 100 fighters samtang nagsunod ang Amerika nga adunay kapin sa 80.
Sa laing bahin, nadugangan og usa ka nasod ang mga sakop sa Wekaf ug kini mao ang Iran, nga mosalmot sab karong tuiga.
Gipatik sa mantalaang SuperBalita Cebu Hulyo 19, 2012.
Isports
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
