Banal midaog, andam na sa world title fight

MIKULIT og dominanteng unanimous decision nga kadaugan si AJ “Bazooka” Banal batok kang Indonesian Ruben Manakane sa miaging gabii sa Dumaguete City Quadrangle.

Sa nag-unang duha ka rounds, gidagandaganan ni Manakane ang tibuok luna sa ring aron likayan ang mga ataki ni Banal, kinsa nagpreparar alang sa umaabot niyang world title fight.

Apan sa 3rd round, nadakpan gyud ni Banal si Manakane ug kaduha kini niya gitumba pulos pinaagi sa makusog nga left straight.

Bisa’g bun-og na gyud, nakamaneho si Manakane pagtiwas sa 10-round non-title bout pinaagi sa kanunay na lang pagdepensa.

Ang tulo ka judges pulos nipadaog kang Banal pinaagi sa 80-70 nga puntos sa ilang tagsatagsa ka scorecard.

Nakabenepisyo sab gyud hinuon si Banal nga nahuman ang away gumikan kay makatabang kini alang sa iyang pahuway sa higayon nga mosagubang na siya’g world title bout, posible karong Septiyembre.

Sa undercard, nga tipik sa ALA-Cobra Energy Drink “Tunay na Lakas” boxing series, mikuha og dakong atensyon si Joseph Von Minoza human niya gipaundang sa 6th round si RJ Ano-os.

Grabeng binukbokay ang nasaksihan una napatumba ni Minoza sulod sa duha ka higayon sa 6th round si Ano-os hangtod nga giundang na sa referee ang away sa ika-1:42 minutos ning maong round.

Sa laing mga away, ningdaog sila si Melvin Gumban batok Aroel Romasasa (TKO 4), Roma Rate batok Lyndel Radoc (MD), Reymund Tabogon batok Lito Dante (SD), Pedro Balaba batok Cristian Saga (TKO 3), Rey Morales batok Ian Teves (TKO 2), Rolando Lingao-lingao batok Steven Recaborda (UD).