Kampiyon na gyud
-A A +ASunday, July 22, 2012
HUMAN sa upat ka mga pagsuway, natuman na gyud ang taodtaod na sab nga gitinguha ni Carlo Biado sa Manila nga masakmit ang korona sa Sun.Star Superbalita 9-Ball Challenge Class A division.
Kagahapon nahitabo ang tinguha ni Biado dihang iyang gilampornas si Butch Agusto, 11-3, sa finals sa labing dakong billiard tournament sa Visayas kagahapon sa SM City Trade Hall.
“Pang four attempts ko na rin. Seguro na panahon na talaga na makuha ko ang title ng tournament na ito,” matod ni Biado, 2011 Philippine National Open champion.
“As past three years na pagsali ko rito, parati na lang sa semis lang ako aabot.”
Sa sayo pa lang, niratsada na ang opensa ni Biado ug niposte dayon kini’g 4-0 nga labaw ug gikan niini, wala na gyud kini molingi pagbalik hangtod nga hingpit niyang nabulsa ang P120,000 nga ganti.
Si Agusto nakadawat og P60,000 nga ganti isip 2nd placer.
Gipasabot ni Biado nga grabe sab gyud ang iyang preparasyon ning maong torneyo ug wala gyud mausik ang iyang paninguha.
“Maganda ang preparation ko kaya kumpiyansa talaga ako na mananalo sa taong ito. Kaya seguro maganda ang tira ko,” dugang ni Biado, kinsa nimasaker kang Renemar David, 9-1, sa semi-finals.
Si David mibawi sa iyang dakong kapildihan batok kang Biado sa semis pinaagi sa paglupig kang Anthony Raga, 9-6, sa inilugay sa ikatulong dapit.
Sa Class B, nakuha ni Jonas Javelona ang korona pinaagi sa 9-6 nga kadaugan batok kang Antonio Delfin sa finals.
Unya sa labing bag-ong gilakip nga Collegiate division, nag-abot sa finals ang parehong estudyante sa University of Cebu-Lapu-Lapu and Mandaue (UCLM) nga sila si Jeffrey Pontanar ug Louie James Boholfe.
Gilupig ni Pontanar si Boholfe, 8-6, aron sakmiton ang korona ug ang katungod nga morepresentar sa Sugbo alang sa National Inter-Collegiate tournament sa Manila.
Sa High School division, gipukan ni Jomar Malait sa Consolacion National High School si John Abing sa University of San Jose Recoletos, 6-5, aron ibulsa ang titulo.
Samtang sa Elementary category, gibuntog ni Joey Inot sa Naga Central School si Christian Doria sa Inayawan Elementary School, 7-4, sa finals.
Gipatik sa mantalaang SuperBalita Cebu Hulyo 23, 2012.
Isports
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
