Casimero kampyon gihapon

NAKAISKOR og knockdown sa 1st round si Filipino Johnriel “Quadro Alas” Casimero aron paghimo’g agianan paingon sa split decision nga kadaugan sa premiro niyang pagdepensa sa International Boxing Federation (IBF) junior flyweight title batok kang Mexican Pedro Guevera kagahapon sa Ma­zatlan, Mexico.

Sa sayong bahin pa lang sa 1st round, gitay-og na ni Casimero ang ka­li­butan ni Guevera pinaagi sa makusog nga left hook.

Paglabay sa pipila lang ka segundos, usa ka makusog nga right uppercut ni Casimero nga miigo sa apapangig ang nagpatumba kang Guevera.

Nakabarog ra hinuon dayon si Guevera ug nakatiwas sa round pinaagi sa pagdagandagan nga depensa.

Sa nagsunod nga rounds, nagsige na lang sab gyud og dagan-dagan si Guevera, hinuon adunay mga higayon nga mokawat kini sa pag-ataki. Nagpadayon ang away nga mao-mao ra gyud ang dagan sa esena- magsige’g dagan-dagan si Guevera unya mokawat-kawat og ataki samtang nagsige lang sab og gukod kaniya si Casimero.

Sa 10th round, kaduha natumba si Guevera apan gitawag kini sa referee nga mga resulta lang sa pagkadakin-as. Pagkahu­man sa away, usa ka judge ang nagpadaog kang Guevera, 114-113, samtang ang laing duha mipadaog kang Casimero, 114-113, 116-111.

Si Casimero, kinsa sakop sa Omega Boxing gym sa Cebu City, misaka sa 17-2-1, 10KOs nga rekord samtang si Guevera, kinsa nakaangkon sa labing una niyang pilde, nahagbong sa 18-1-1, 13KOs nga ba­­raha.