SWU Cobras gisurprisahan sa Jaguars, 80-72

DIHANG nagpaingon pa lang ang kombati, daan nang nag-ingon si University of San Jose Recoletos (USJR) Jaguars coach Edito Salacut nga aduna siya’y pang-alkontra sa duha ka higanteng mga langyaw sa Southwestern University (SWU) Cobras – usa ka sekretong depensa.

Sa miaging gabii, gibulgar sa Jaguars ang maong sekretong depensa aron pakagingon ang grabe ka inilog nga Cobras, 80-72, sa Cebu Schools Athletic Foundation Inc. (CESAFI) basketball college division.

“Taghap lang seguro to. Naninguha lang gyud ang akong pla­yers sa depensa,” matod ni Salacut, kansang Jaguars nakahatag og makuyaw nga mensahe ngadto sa ubang teams human sa makapakurat nga kadaugan. Gamit ang ilang depensa, napasutoy sa Jaguars ang ilang opensa sa sayong bahin pa lang sa kombati ug nakalabaw dayon sila’g 13-2. Hinuon pagkahuman sa 1st quarter, nakasikit ra dayon pagbalik ang Cobras ni coach Raul “Yayoy” Alcoseba.

Sa puli-puling presensya sa Cameroonians nga sila si Justin Aboude ug Benoit M’Bala, nakaposte og 40-30 nga labaw ang Cobras sa nahabiling 2:13 minutos sa 2nd round.

Gikan niadto, kanunay na lang gyud mopahamtang og kalit nga double team ang Jaguars ngadto sa mga langyaw sa Cobras nga sagulan nila’g 1-3-1 zone defense.

Tungod sa ilang depensa, aginod nilang nabawi ang labaw, 68-66, sa nahabiling 3:36 minutos sa pagpangilo ni Medget Dela Rama. Human niadto, puwerte gyung pagkabalit-ara sa momentum ug wala na nakabangon pagbalik ang Cobras.

Gipangulohan ni Abulaiz Suliman ang kadaugan pinaagi sa iyang 16 puntos samtang nidugang og 10 puntos matag usa sila si Matthew Parker ug Dela Rama. Ang Cobras gipangulohan ni Mbala pinaagi sa iyang 15 puntos, niamot og 10 puntos matag usa sila si Joseph Nalos ug Bonifacio Guillena samtang nitunol og walo ka puntos si Aboude.