Migallen: Cycling ug boxing

KARONG adlawa, mosikad na ang Cebu Challenge-Tour of Cebu diin salmotan sa pipila ka mga inilang siklesta sa nasod.

Misulong karon sa Sugbo ang grupo nila ni Arnel Quirimit ubos ni coach Jess Garcia sa Pangasinan ug ang grupo usab sa bantugan ug 1992 Tour of the Philippines champion Renato Dolosa kinsa mao na karon ang nag-coach sa Bicol team.

Dinhi sa Sugbo, ang pundok usab ni 1986 champion Boy Pagnanawon todo usab ang ilang pagpangandam ingon man ang grupo nila ni Nino Surban nga ubos sa pagdumala ni Boying Rodriguez Danao City.

Mga napulo ka mga teams ang gituohang nga mosalmot. Kon di pa tungod sa lunop nga nahitabo sa Kaulohan ubay-ubay gyud unta ang teams nga mangapil.

Actually kining Cebu Challenge namugna ni niadtong early 1990s. Sa 1996, napahigayon ang Cebu Challenge-Tour of Central Philippines nga mitadlas sa mga isla sa Region 7.

Si kanhi Customs Collector David “Boy” Odilao Jr., kinsa maoy utok ning tanan, mibutyag nga sunod tuig ilang palapdan pa ang pagpahigayon ning maong kompetisyon.

Nindot ni alang sa atong mga local cyclists kay mao ni usa sa mga paagi aron mahashasan ang ilang abilidad.

Keep up the good work, Kuya Boy.

*******

Wa pa ni mapinalisar, apan gilihok na karon ni boxing promoter Rex “Wakee” Salud ang posibling pagpaaway ni RP superflyweight champion ug undefeated knockout artist Marco Singwangcha Demecillo, Marlon Tapales ug Dodie Boy Penalosa Jr. sa Dubai.

Usa ka Filipino promoter nga atoa nagbasehan sa Dubai ang moanhi sa Sugbo sunod semana aron hingpiton na ang negusasyon.

Natural mga langyaw ang ikontra sa tulo ug mao usab kini unang higayon nga makaaway
sila sa abroad.

********

Talking of boxing, porbida sa nagpadayon nga Olympics didto sa London, ang boksing event maoy grabi nakamugna og kontrobersiyal.

Abi nako og alibi lang to sa atong mga boxing officials kadtong ilang rason kon nganong miprotesta sila sa officiating sa dihang na­­pildi ang atong Mark Anthony Barriga batok Kazakhstan, hasta sab diay ang ubang nasod.

Tiaw mo bay duha ka mga boxing officials ang gipapauli ug gisuspenso.

Gawas sa gihimo sa atong mga kadagkuan sa ABAP, duna usay mga nasod nga nasagmuyo sa mga desisyon ug mipasaka usab og protesta.

Ang uban gi-entertained pero ang uban wa sab. Mora og palakasay ra diay gihapon. Mao ni usa sa mga rason nganong maglisod ta sa Olympics nga maka-gold sa boxing.

Remember Onyok Velasco? Ka klaro ato. Daog sa away, pero pildi sa desisyon.

Sa boxing, di lang diay exposure ug ensayo maoy maghatod sa kalampusan kon dili mao usab ang pagpalapad sa atong koneksyon.

(junmigs0622@yahoo.com)