Sunod away ni Pacquiao gituki

GISUGDAN na ni Top Rank boss Bob Arum ang seryusong pagpakighugpong kang Manny Pacquiao alang sa sunod nga away sa Pambansang Kamao sa Pilipinas.

Gipasabot ni Arum nga aduna sa’y gustong maki-grematch si Pacquiao kang American Timothy Bradley, kinsa mipakaging sa kalibutan sa boksing dihang iyang gilupig si Pacquiao pinaagi sa kontrobersyal nga split decision niadtong Hunyo 9.

Apan alang kang Arum, mas mahalin sa kadaghanan ang ika­upat nga panag-away nila ni Pacquiao ug Mexican Juan Manuel Marquez.

“With Bradley, the general sports fan, at least anecdotally, wants them to have a rematch,” batbat ni Arum sa interbyu sa ESPN.com.

“People I go out to dinner with or people I visit with, they all talk about the rematch with Bradley, not a fourth fight with Marquez - but they aren’t Hispanics. The Hispa­nic fans are the ones who want the fourth fight with Marquez.”

Nidugang si Arum nga ang Hispanic fanbase ni Marquez makatabang sab gyud sa pinansyal nga benepisyo alang kang Pacquiao basi sa halin sa pay-per-view.

Hinuon katulo na sab nagharong ang duha diin kaduha midaog si Pacquiao samtang ang usa miresulta sa panagtabla. Pulos kontro­bersyal ang maong mga away.

“Marquez did 400,000 buys more than Bradley,” pasabot ni Arum. “That fight did a little better than 900,000, so I have to consider that. And Marquez is very anxious for the fight, too.”

Gawas nila ni Marquez ug Bradley, gikonsiderar sab ni Arum ang rematch batok kang Puerto Rican Miguel Cotto.

Giklaro ni Arum nga ning puntoha, wala pa niya ikonsiderar si Floyd Mayweather Jr. gumikan sa mga naagian sa kontrobersyal nga boksidor.