10 ka mga depensa

TINGUHA ni International Boxing Fe­deration (IBF) junior flyweight champion Johnriel “Quadro Alas” Casimero nga mag­pabiling kampiyon sulod sa dugayng pa­nahon.

Gani matod niya nga kon ma­­himo, madepensaan niya ang iyang korona sulod sa 10 ka mga higayon una siya mag­hunahuna og laing titulo sa lain nga timbang.

“Gusto nako nga ma­­­kadepensa ko sa a­­­kong bakus mga napu ka hi­gayon,” matod ni Ca­si­mero sa usa ka press con­ference sa Omega Boxing gym sa Mabolo kagahapon nga gipahigayon sa iyang pagbalik gikan sa dakong kalampusan.

Niadtong Dominggo sa Mexico, ang gitawag og Quadro Alas ug lumad nga taga Ormoc Ci­ty nakadepensa sa iyang korona sa labing unang higayon pinaagi sa impresibong split decision nga kadaugan batok sa kang Ped­ro Guevera.

Ang international promoter nga si Sam­my “Don King” Gel­loa­ni, kinsa maoy res­ponsable sa dagkong mga oportunidad nga niabot kang Casimero, sayod sa tinguha sa Quadro Alas ug andam siyang mosuporta niini.

“Mao lagi na ang iyang sulti nako nga kon mahimo, ten times siya maka-defend sa iyang title,” matod ni Gelloani.

“Pero kinahanglan mo-step up gyud ang iyang training. We want something new sa iyang training nga ma-develop ang iyang skills. The power is already there, pag-improve lang gyud sa iyang skills atong buhaton.”

Ang trainer ni Casimero nga si Pingping Tepora andam sab mohangop sa gustong mahitabo ni Gelloani kabahin sa training ni Casimero.

“Kon unsa’y maayo para sa atong bo­xer mao na ang atong buhaton,” asoy ni Te­pora.

Gipasabot ni Gelloani nga ning puntoha, wala pa siya’y plano sa usa ka unification bout ug gusto niyang depensaan lang una ni Casimero ang iyang titulo sulod sa daghang higayon.

“Dili una ta magsulti anang unification. Untimely pa kaayo kay first time pa siya nakadepensa sa iyang title. We just want Casimero to defend his title,” dugang ni Gelloani.

Plano ni Gelloani nga padepensaon si Casimero karong Oktubre o Nobiyembre dinhi sa Sugbo alang sa sunod niining tahas.

Hinuon iyang gitataw nga dili kini sayon buhaton apan kon dili mahitabo, matod niya nga dili sila magpanaga sa pag-asdang bisan asa nga nasod.

“Casimero knows how to fight in a foreign land. Kon makaya nato, Im planning to stage his next defense here in Cebu,” asoy ni Gelloani.

“It will be some time in October or November. It could be stage here or in Mexico, bisan asa dili man ta ma­hadlok. Ang atong boxer dili mahadlok, ang promoter dili sab mahadlok.”

Si Casimero, 22, adunay 17-2-1, 10KOs nga baraha.