Cobras vs. Panthers sa Cesafi

Mga duwa karon:
5:00 pm- CEC batok SHS-J/AdC (jrs)
6:30 pm- SWU batok USPF

MOSUWAY pagbawi gikan sa masakit nga kapakyasan ang Southwestern University (SWU) Cobras sa ilang pagpakigbatok sa University of Southern Philippines Foundation (USPF) Panthers sa main game karong gabii sa Cebu Schools Athletic Foundation Inc. (Cesafi) college division sa Cebu Coliseum.

Ang Cobras, nga usa sa labing inilog sa torneyo gumikan sa duha nila ka mga langyawng magduduwa, gipakaging sa University of San Jose Recoletos (USJR) Jaguars, 72-80, sa premiro nilang tahas.

Sama sa Cobras, ang Panthers nasubhan sab og kapildihan batok sa 9-time champion University of the Visayas (UV) Green Lancers, 86-63.

Ning kombatiha, gituohang pahimungtan sa Cobras ni coach Raul “Yayoy” Alcoseba ang Panthers.

Hinuon kon molugak og gamay ang Cobras, hayan puwede silang madisgrasya sa mga kamot sa Panthers ni coach Raul Latonio.

Sa premirong duwa, magsangka ang parehong gikahadlukan sa high school division nga mao ang 2010 champion Cebu Eastern College (CEC) Dragons ug back-to-back runner-up Sacred Heart School Jesuits-Ateneo de Cebu (SHSJ-AdC) Magis Eagles.

Ang duha ka mga kampo parehong nasubhan og dagkong kadaugan batok sa tagsatagsa nila ka kontra.

Sa laing bahin, gipanglubong og taga liog sa University of Cebu (UC) Baby Webmasters ang Don Bosco Technological Center (DBTC) Baby Greywolves, 88-38, sa high school division.

Sama sa gilauman, ningdominar dayon ang Webmasters sa sayong bahin pa lang sa kombati.

Kini maoy ikaduhang kadaugan sa Baby Webmasters ug ikaduha usab kini nga kapildihan sa Baby Greywolves.

Ning pagsuwat, padayon pang nagsangka sa main game kagabii ang UC Webmasters ug Cebu Institute of Technology University (CITU) Wildcats sa college division.