Dragons gidagit sa Magis Eagles
-A A +AFriday, August 10, 2012
Mga duwa karon:
1:00 pm- SHSJ batok DBTC (jrs)
2:30 pm- CEC batok USJR (jrs)
4:00 pm- CIT batok UC (jrs)
5:30 pm- USJR batok UC (jrs)
GIPANGDAGIT sa Sacred Heart Schools Jesuits-Ateneo de Cebu (SHSJ-AdC) Magis Eagles ngadto sa kapildhan ang Cebu Eastern College (CEC) Dragons, 71-61, kagahapon sa usa sa mga giatngang kombati sa high school division sa Cebu Schools Athletic Foundation Inc. (CESAFI) sa Cebu Colisuem.
Ang Magis Eagles, nga gipangbugwakan og kayo sa Dragons sa 2010 championship series, nakasugat gyud og grabe kasikit nga kombati sa 1st quarter. Igo lang silang naglabaw og 19-18 pagsugod sa ikaduhang quarter.
Hinayhinayng ningkapakapa ang pako sa opensa sa Magis Eagles hangtod nga nakaposte gyud sila’g dakodakong labaw sa 4th quarter sa pagpangulo ni Henrick Ochea.
Adunay higayon nga moaksyon pagbugwak og kayo nga opensa ang Dragons sa 4th quarter apan nalupig gyud sila sa lahutay sa Magis Eagles.
Gipangulohan ni Ochea ang Magis Eagles pinaagi sa iyang 14 puntos samtang ang Dragons gipangulohan ni Lorenzo Balangkig pinaagi sa iyang 15 puntos.
Kini maoy ikaduhang sunodsunod nga kadaugan sa Magis Eagles samtang ang Dragons natagak sa 1-1 nga baraha.
Magpadayon ang aksyon karong adlawa diin mag-abot ang back-to-back college defending champion University of Cebu (UC) Webmasters ug University of San Jose Recoletos (USJR) Jaguars.
Ning sangkaa, tatawng inilog ang Jaguars gumikan kay gikan kini sa dakong kapildihan batok sa usa sa mga gikahadlukan nga mao ang Southwestern University (SWU) Cobras, 80-72.
Samtang ang Webmasters gikan sa kapildihan batok sa University of San Carlos (USC) Warriors, 79-86.
Hinuon, ang kasinatian sa Webmasters isip kampiyon makahatag gyud kanila og dugang pagsalig sa kaugalingon nga ilang magamit sa ilang kampanya.
Sa high school division, ang Magis Eagles makigsangka sa Don Bosco Technological Center (DBTC) Baby Greywolves sa premirong duwa ug sundan kini sa engkuwentro sa Dragons batok USJR Baby Jaguars.
Sa ikatulong kombati, magharong ang UC Baby Webmasters ug Cebu Institute of Technology University (CITU) Wildkittens.
Gipatik sa mantalaang SuperBalita Cebu Agosto 11, 2012.
Isports
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
