Roque nanghawod

GIDOMINAR ni Rudy Roque sa LBC Team criterium circuit race nga maoy por­mal mitapos sa lima ka adlaw nga Cebu Challenge –Tour of Cebu nga gipahigayon sa may Park Mall, Reclamation area, dakbayan sa Mandaue.

Way kulba nga mitapos si Roque sa 60 ka kilometro o napulo ka tuyok sa maong dapit uban sa iyang teammate nga si Rustom Lim.

Ikatulong milabang sa finishing line si Ericson Obosa sa Pangasinan.

Hinuon ang maong circuit race di makaapekto sa resulta sa overall champion sa proper race diin ang Sugboanong si John Renee Mier, sakop sa LBC team maoy kampiyon.

Kagahapon human sa circuit race gipa­higayon gilayon ang awarding ceremonies sa individual ug team competition.

Nagsunod kang Mier sa overall standing si Irish Valenzuela sa LPG ug ikatulo si Tots Oledan sa Cycle Line.

Sa team competition, ang LPG-MA maoy mipatugbabaw, nagsunod ang Pangasinan ug ikatulo ang Cycle Line.

Subay niini, tinguha sa orga­nizer nga si kanhi Customs Collector David S. Odilao nga palapdan pa ang maong Cebu Challenge sa sunod tuig.

Gani ingon ni Odilao, kanhi chairman sa Ministry of Sports and Youth Development (MSYD) nga posibling adunay dakong cyc­ling competition sa naghinapos nga bahin ning tuiga.

“Hopefully madayon ni. Before or on December makapahigayon ta og mas dako pa nga tournament,” matod ni Odilao kinsa mapasalamaton usab kaayo sa mga local government nga miayuda sa maong race.

“Supportive man kaayo ang mga local government unit bisan tuod og not in term of cash. Thankful kaayo ta nila,” dugang ni O­dilao.