Fajardo gituohang mapiling no.1 rookie pick

KINSA gyud kaha? Mao kini ang pangutana nga giatangang matubag karong alas 4:00 sa hapon kabahin sa kon kinsa’y mahimong no.1 overall pick sa 2012 Philippine Basketball Association (PBA) Rookie Draft sa Midtown Robinson’s Place sa Ermita, Manila.

Gituohan nga ang Sugbuanong higante nga si Junemar Fajardo maoy mapiling no.1 overall pick apan hangtod nga wala pa’y opisyal nga pag-anunsyo ang Petron Blaze Boosters sa ilang desisyon, wala pa kini kaseguroan.

Sa nangaging mga adlaw, ang Petron ningpabuhagay nang daan sa ilang interes kang Fajardo, kinsa lumad nga taga Pinamungajan, Cebu ug produkto sa University of Cebu (UC) Webmasters.

Sa opisyal nga pagsugod sa gitas-on, si Fajardo nakalista nga 6’10” nga nagtiniil ug siya ang labing taas sa 57 ka mga rehistrante.

Sa miaging tuig pa unta puwedeng makapa-draft si Fajardo apan miduwa kini Asean Basketball League (ABL) ubos sa kampo sa San Miguel Beermen, tag-iya sa franchise sa Petron.

Ang kampo ni Fajardo nipabuhagay nang daan nga kon dili makuha sa Petron ang katungod sa no.1 pick, dili pa gyud kini magpa-draft sa PBA.

Mobuhi sa opisyal nga pag-anunsyo sa Petron mao ang bag-o nilang coach nga si Olsen Racela.

Kagahapon lang gyud nakompirmar nga ang kanhi bantugang pointguard sa San Miguel mao na karon ang mogiya sa Petron.

Ang mopili sa no.2 pick mao ang Alaska Aces dayon balik sa Petron alang sa no.3 sunod ang Meralco Bolts sa no.4, Barako Bull sa no.5, Brgy. Ginebra sa no.6, Rain or Shine Elasto Painters sa no.7, Ginebra sa no.8, B-Meg Llamados sa no.9, ug ang bag-ong sulod nga Global Port sa no.10.

Gituohang makuha sab sa top 10 mao sila si Calvin Cueva, Chris Tiu, Cliff Hodge, Chris Ellis, Alex Mallari, Keiuth Jansen, Vic Manuel, ug Aldrech Ramos.

Ang Air 21 Express sa pagsugod pa sa 2nd round mopili samtang ang Talk N’ Text Tropang Texters sa 20th overall pa modesisyon sa ilang kuhaon.