Fajardo no.1

SAMA sa gilauman, gipili sa Petron Blaze Boosters ang Sugbuanong higante nga si 6’10” Junmar Fajardo isip no.1 overall pick kagaha­pon sa 38th Philippine Basketball Association (PBA) Annual Rookie Draft sa Robinson’s Place sa Malate, Manila.

Ang produkto sa University of Cebu (UC) Web­­masters, kinsa katapusang nagduwa sa San Miguel Beermen sa San Miguel Beermen sa ASEAN Basketball League (ABL), mipasalig nga buhaton niya ang tanan aron makatabang sa Blaze Boosters.

Nagkanayon si Fajar­do nga mapasalamaton kaayo siya sa pagsalig nga gihatag sa Petron ngadto kaniya ug labaw sa tanan ang UC nga ma­oy nag-agak kaniya ug naghashas sa iyang abilidad.

Si PBA commissio­ner Chito Salud miasoy ngadto sa 57 ka mga aplikante nga ang pagkasulod nila sa PBA mao pa lang ang sinugdanan sa mas malisod nga tahas paingon sa kalampusan.

“I want to instill and illuminate a model of in­tegrity. Joining the PBA is not an end but it is just the bigginning of a continuing commit­­­ment,” pasabot ni Sa­lud.

Human sa turno sa Petron, ang Alaska Aces mipili kang NCAA MVP Calvin Abueva sa San Sebastian College Stags isip no.2 overall.

Mibalik ang turno sa Petron ug gipili nila isip no.3 overall pick si 6’2” Filipino-American Alex Mallari.

Ang Meralco Bolts mipili kang 6’3” Clifford Hodge isip no.4 overall unya gisundan kinisa Barako Bull, nga ningkuha ni kanhi Far Eastern University stalwart 6’6 Aldrich Ramos isip no.5 overall.

Si 6’4 Christopher Ellis gipili sa Brgy. Ginebra Gin Kings isip no.6 overall samtang si Chris Tiu, kanhi team captain Smart Gilas, gikuha sa Rain or Shine Elasto Painters isip no. 7.

Ang no.8 pick mao si Fil-Am Keith Jensen, kinsa gikuha sa Ginebra, no.9 si Vic Manuel sa B-Meg Llamados samtang no.10 si 6’5 JasonDeutchman sa GlobalPort.