Pagara, Servania, Jaca nangulata og mga Mexicano

PINANGULOHAN sa brutal nga panimalos ni Jason Pagara, nangharos ang Pinoyng mga boksidor batok sa Mexicans nga kontra sa miaging ga­bii sa “Pinoy Pride XV: Philippines vs. Mexico The Rematch boxing pro­motion sa Waterfront Hotel sa Lahug, Cebu City.

Si Pagara (29-2, 18KOs) kau­pat nakaiskor og knockdowns – tanan pulos pinaagi sa body shot – sa iyang pagposte og 6th round TKO nga kadaugan batok kang Rosbel Montoya (36-5-1, 30KOs) sa main event sa promosyon nga gipa­siug­dahan sa ALA Promotions ug ABS-CBN.

Ang impresibong kadaugan usa ka brutal nga panimalos ni Pagara ngadto kang Montoya, kinsa naglupig kaniya pinaagi sa unanimous decision nga kadaugan niadtong Septiyembre sa miaging tuig.

Sa 1st round pa lang nasayran na ni Pagara kon unsa ang iyang pun­teryahon dihang napatumba niya si Montoya pinaagi sa body shot nga gisundan og kumbinasyon.

Sa 3rd round, gipatumba pag­ba­lik ni Pagara si Montoya, kin­sa mi­luwa sa iyang mouthpiece nga gi­tuohang usa ka taktika aron ma­ka­pahuway og taastaas.

Sa mao gihapon nga round, na­tumba na sab si Montoya pinaagi gihapon sa body shot.

Sa 4th round, daw naulian si Montoya ug misukol kini’g pasud­lanay og mga kinumo ngadto sa bodega ug mao usab kini ang esena sa 5th round.

Apan sa 6th round, solidong kumo ni Pagara ang miigo sa bukton nga milahos sa kilid ni Montoya, kin­sa natumba na sab pagbalik. Ning higayuna, giundang na sa referee ang away.

Gipasabot ni Pagara nga usa gyud sa ilang mga plano ang pag-ataki sa bodega ni Montoya.

“Plano man gyud namo nga ata­kihon siya’g body shots kay sa first fight nabantayan namo nga sakitan gyud siya kon maigo sa lawas,” pa­­sabot sa 21 anyos nga Pagara, kin­sa miangkon sa bag-ong WBO Inter­national jr. welterweight title.

Sa laing bahin, ang stablemate ni Pagara sa ALA gym nga si Genesis Servania (19-0, 8KOs) impresibo sab kaayo sa iyang pagpopste og do­minanteng unanimous decision nga kadaugan batok kang Jorge Pazos (21-4, 14KOs).

Ning maong away, katulo gitum­ba ni Servania si Pazos – 1st rd., 8th rd. ug 11th rd. – ug sa gra­beng bun-og nga iyang nadawat, nagsukasuka si Pazos nga gidala sa ospital.

Naka­gawas na siya kagahapon sa udto ug luwas na sa makuyawng kahimtang.

Ang tulo ka judges parehong mihatag og 118-107 sa ilang tag­sa­tagsa ka scorecard alang kang Ser­vania, kinsa miangkon sa WBO Asia Pacific super bantamweight title.

Samtang ang laing sakop sa ALA gym nga si Jimrex Jaca (40-6-3, 20KOs) impresibo sab kaayo sa iyang pagposte og 8th round knock­out nga kadaugan batok kang Angel Martinez (18-3-1, 13KOs).

Nakaiskor og knockdowns si Jaca 3rd ug 7th rounds unya gi­hu­man niya ang away pinaagi sa knock­out sa ika-2:29 minutos sa ika­walo ug katapusang round sa ilang non-title bout.