Marquez target ni Jaca

HUMAN sa iyang impresibong kadaugan sa “Pinoy Pride XV: Philippines vs. Mexico The Rematch boxing promotion sa Waterfront Hotel sa Lahug, Cebu City niadtong Dominggo, nagtinguha si Jimrex “The Executioner” Jaca nga makig-rematch kang Mexican legend Juan Manuel Marquez.

Si Jaca (40-6-3, 20KOs), kinsa miposte og 8th round knockout nga kadaugan batok kang Mexican Angel Martinez (18-3-1, 13KOs) sa Pinoy Pride XV, nagpanikad gyud human niya masayri pinaagi sa internet nga nagpangita karon og walhon nga kontra si Marquez.

Usa kini ka lakang aron ipreparar nang daan ni Marquez ang iyang kaugalingon alang sa posibleng ikaupat nilang away ni 8-time world champion Manny Pacquiao.

Nagkanayon si Jaca, kinsa usa ka walhon, nga kon hatagan og oportunidad, andam siyang makig-away pagbalik kang Marquez bisan kanus-a ug bisan asa.

“Nangita man lagi kuno’g walhon si Mar­quez, akong ipresentar akong kaugalingon. Andam kong mo-rematch niya,” matod ni Jaca.

Sa premiro nilang away niadtong Nobi­yembre 25, 2006 sa Texas, USA, si Jaca nakahatag sab gyud og saktong sinukmagay batok kang Marquez una siya napilde pinaagi sa 9th round TKO.

“Basta kon mahatagan lang og chance, mag-training gyud ko’g maayo kay gusto kong mobawos ni Marquez,” dugang ni Jaca.

Ang ALA Promotions, nga mao karon ang naggiya sa boxing career ni Jaca, nagkanayon nga adunay posibilidad nga mahitabo ang Marquez-Jaca rematch.

Nagkanayon si ALA Promotions president Michael Aldeguer nga ilahang suwayan paglihok kon mahitabo ba ang rematch.

“Actually mao man gyud na ang atong direction for Jimrex. We’ll try to see what we can do. I believe it can happen kay nangita man og walhon si Marquez. We will see,” asoy ni Aldeguer.