Fajardo dli modominar

GAWAS nila ni no.2 pick Calvin Abueva sa Alaska Aces ug no.7 pick Chris Tiu sa Rain or Shine Elasto Painters, kuwestiyunable pa ang kapabilidad sa ubang mga nangapili sa 2012 Philippine Basketball Association (PBA) Rookie Draft niadtong Dominggo.

Mao kini ang panahom nga gipabuhagay sa nagkadaiyang mga coach ug assistant coach sa liga.

Hasta ang no.1 overall pick sa Petron Blaze Boosters nga mao ang Sugbuanong higante nga si 6’10” Junmar Fajardo gituohang dili makahimo’g grabeng langas.

Nagtuo si Rain or Shine assistant coach Caloy Garcia nga sa puwersa sa Petron, nga daghan dekalidad nga mga magduduwa, maglisod si Fajardo pagkuha og taas nga oras.

“He will just give Petron’s game an additional dimension, but playing in a star-studded team, you need minutes to shine,” pasabot ni Garcia sa interbyu sa www.tv5.com.ph. “I don’t see anyone who will have a major impact in the game.”

Alang kang Air 21 coach Franz Pumaren, wala siya’y nakit-an nga makadominar bisan sakto sa talento ang bag-ong grupo sa rookies.

“I don’t see anyone who will dominate the game,” asoy ni Pumaren.

Sa iyang bahin, si Rain or Shine coach Yeng Guiao nagtuo nga sila ra gyud si Abueva ug Tiu ang makahimo gyud dayon og grabeng kanaas sa liga.

“Other than Calvin Abueva and Chris Tiu, I don’t see anybody else,” batbat ni Guiao.

“Abueva because his game stands out among the rookies and Chris because he’s a smart player and popular.”

Si San Miguel Coffee (kanhi B-Meg) coach Tim Cone nakadayeg sab gyud kang Abueva. Matod niya kon wala pa siya mibiya sa Alaska, si Abueva gihapon ang iyang pilion.

“He’s a game changer,” paghulagway ni Cone kang Abueva. “If I were with Alaska, I would do the same. Even if I have James [Yap] or PJ [Simon], you will simply have to figure out a way to squeeze some playing time with this guy.”

Alang kang Pumaren, suwerte ang Rain or Shine nga nakatayming sila pagkuha kang Tiu.

Gipasabot ni Pumaren nga nanghinaot siya nga dili pa makuha si Tiu inig abot sa ilang turno (11th pick) apan wala kini nahitabo.

“Did I wish for Chris Tiu to become available as an 11th pick? Yes, I did,” batbat ni Pumaren.

“I was hoping I could get him, pero masyado namang wishful thinking ako. but if given the chance, I would certainly pick him because he’s so smart and he’s already matured for a rookie with his stints in SMART-Gilas. He played major minutes with Rajko Toroman before and he has leadership qualities.”

Nidugang si Pumaren nga dako gyud kaayo’g ikatabang si Tiu sa kampanya sa Rain or Shine.