RP Gilas 3-0 na

NAGPABUTO og duha ka sunodsunod nga jump­shots si Gary David sa hinapos nga bahin aron aswaton ang RP Gilas 2 ngadto sa 82-79 nga kadaugan batok sa Korea kagahapon sa 2012 William Jones Cup sa Taipei, Taiwan.

Ang mga Pinoy nagpabilin sa ibabawng da­pit dala ang 3-0 nga rekord diin ilang gikauban og puwesto ang Iran.

Sa pagpangulo ni na­turalized Marcus Douthit, ang Gilas 2 nakaposte og 14 puntos sa 2nd quarter apan mi-rally ang Koreans ug natabla nila ang duwa, 40-40, sa dayong pagkahuman sa halftime.

Sa pagsugod sa 3rd quarter, niaksyon pagsutoy ang mga Pinoy pinaagi sa upat ka sunodsunod nga puntos ni Douthit.

Apan human niadto, ning-rally na sab ang Koreans, 21-7, aron pagposte og 12 puntos nga labaw, 61-49.

Sa pagpangulo ni Jeff Chan, ang Gilas 2 nakamugna og 7-0 run aron pahakan ang labaw sa Korea, 56-61.

Giinat pagbalik sa Koreans ang ilang labaw ngadto sa 71-63 apan wala gyud nagpalubong ang Gilas 2.

Human niini, si Sol Mercado na sab ang ningdugkat sa rally sa Gilas 2 unya milihok na sa og sugod si David aron ihatag pagbalik sa mga Pinoy ang labaw, 76-75, sa nahabiling kapin sa 5:00 ka minutos.

Gikan niadto, grabe na gyud kaayo kasikit ang kombati ug naluwas lang ang Gilas 2 sa duha ka sunodsunod nga jumpshots ni David, kinsa niamot og 13 puntos.

Ang Koreans nahagsa sa 2-2 nga rekord.