SWU sa semis

NAKASULOD sa semi-finals ang Southwestern U­­ni­versity (SWU) Cobras human nila gipangpahit ang Cebu Institute of Technology U­niversity (CITU) Wildcats, 91-70, kagahapon sa Cebu Schools Athletic Foundation Inc. (CESAFI) college division quarter-finals sa Cebu Co­liseum.

Ang Cobras, nga naggunit og twice-to-beat nga bintaha ning maong panagparang, na­kig-uban sa 9-time champion University of the Visayas (UV) Green Lancers nga ma­oy unang mitaak sa semis pi­na­agi sa automatic slot nga ilang nadawat nga benepisyo isip no.1 team human sa elimination round.

Gikan sa sinugdanan hang­tod sa katapusan, kontrolado gyud sa Cobras ni coach Raul “Yayoy” Alcoseba ang kombati apan dili tanan maayo ang pang­hitabo alang kanila.

Sa nahabiling 2:48 mi­nutos diin naseguro na nila ang kadaugan pinaagi sa 83-67 nga labaw, wala damhang naangol ang usa sa ilang labing sinaligang langyaw nga si Cameeronian Benoit M’Bala.

Niaksyon sa pagpalak si M’Bala sa tira sa usa sa mga sakop sa Wildcats apan dili maayo ang iyang pagtugpa hinungdan nga naangol ang iyang wala nga tiil.

Giagak si M’Bala sa pag­gawas sa korte ug ning pag­suwat, wala pa masayri kon unsa ka seryuso ang maong angol.

Si M’Bala mihuman sa duwa nga adunay 17 puntos samtang ang iyang kababayang si Justin Aboude nitunol og 23 puntos aron pangulohan ang kadaugan. Niamot sab og 17 puntos si Monbert Arong alang sa Cobras.

Dili hinuon mangil-ad ta­nan ang balita alang sa CITU gumikan kay ang ilang manghod nga mao ang Wild­kittens nakaabante man sa se­mis pinaagi sa 96-85 nga kadaugan batok sa University of Cebu (UC) Baby Webmasters sa high school division quarter-finals.

Sa laing sangka sa high school division, makakita pa’g laing pagsidlak sa adlaw ang Cebu Eastern College (CEC) Dragons human nila gipang­lupig ang twice-to-beat nga University of San Carlos (USC) Baby Warriors, 83-70.

Puntos matag usa:

SWU (91)- Aboude 23, Mbala 17, Arong 17, Dedace 16, Bregondo 7, Casquejo 4, Ortuyo 3, Nalos 2, Goloran 2, Pajantoy 2. CITU (70)- Rabaya 21, Taghoy 15, Taboada 12, Dimco 11, Brigoli 4, Batiquin 2, Tabalin 2, Sanchez 2, Infante 1.