95% na nga madayon

GAMAY na lang ang kuwang ug ma-finalize na ang ikaupat nga panagharong nila ni 8-time world champion Manny Pacquiao ug Mexican Juan Manuel Marquez.

Nagkanayon ang promoter ni Marquez nga si Zanfer Promotions head Fernando Beltran nga mga 95% na ang nalansang sa negusasyon ug sa umaabot nga mga adlaw, puwede na kini nilang opisyal nga ianunsyo sa publiko.

“Verbally we can announce that on December 8, we will have this fight, but nothing more because I am being conservative. I say that 95% it is closed [a done deal],” asoy ni Beltran sa interbyu sa www.boxingscene.com.

Mao kini nga away nga gipa­ngandoy ni Marquez sa dili pa siya moretiro hilabi na kay pulos kontrobersyal ang resulta sa nag-unang tulo ka mga away.

Niadtong 2004 unang nag-away ang duha ka mga boksidor diin nakabangon gikan sa tulo ka knockdowns sa 1st round si Marquez ug nakapugos pa’g panagtabla.

Niadtong 2008 nag-abot pagbalik ang duha ug gitumba ni Pacquiao kausa sa 3rd round si Marquez aron paghimo’g agianan paingon sa split decision nga kadaugan.

Niadtong Nobiyembre sa miaging tuig, nagsangka na sab sila ug midaog si Pacquiao pinaagi sa majority decision.

“The only reason I cannot guarantee the fight is because there is not a signed contract from Pacquiao before us, however, in the coming hours, we will have it,” pasabot ni Beltran.

Si Marquez usa sa tulo ka mga boksidor nga gipangkonsiderar sa promoter ni Pacquiao nga si Top Rank boss Bob Arum aron iparang sa Pambansang Kamao sa Pilipinas karong Disyembre.

Ang laing duha mao sila si American Timonthy Bradley ug Puerto Rican Miguel Cotto.

Ning bag-uhay lang, napapas ang pangalan ni Cotto sa listahan kay nakadesider na kining ma­kig­kontra og lain.

Dili sab uyon si Arum kang Brad­ley gumikan kay dili kini mokita og dako sa pay-per-view basi sa ilang away ni Pacquiao niadtong Hunyo diin kontrobersyal nga midaog si Bradley.

“Pacquiao knows that he needs to fight Márquez in order to regain his credibility. And even more so after the controversial defeat against [Timothy] Bradley; now he knows what it feels like. It is the opportunity for him to vindicate himself with the boxing world and the opportunity to clearly beat Juan,” dugang ni Beltran.

Sa laing bahin, ang World Boxing Council-Hublot program mopasidungog kang Pacquiao isip “Legend of Boxing” sa sunod tuig.