Morales hagbong sa drug test

POSITIBO si kanhi world champion Mexican Erik Morales sa gipahigayong random drug test pipila ka mga adlaw sa dili pa sila magsangka si Danny Garcia.

Nagkanayon si Golden Boy Promotions executive Richard Schaefer nga nadiskubrihan sa US Doping Agency (USADA) nga adunay “irregularities sa A sample ni Erik Morales.”

Nagpasabot kini nga posibleng nigamit si Morales og performance enhancing drugs nga gidili sa kalibutan sa paugnat kusog.

“We were informed late on Tuesday night by USADA that they found some irregularities in an A sample from Erik Morales, and on Wednesday -- yesterday morning -- the respective camps and the commission were informed accordingly by USADA,” asoy ni Schaefer sa interbyu sa RingTV.

Hinuon sa taho sa ESPN, ang panagharong nila ni Morales ug Garcia madayon ra gihapon karong adlawa sa Brooklyn, New York.

Matod pa sa tinubdan sa ESPN, ang rason nga wala makanselar ang away gumikan kay gihuwat pa ang resulta sa B sample ni Morales.

“As far as I know, the fight is going on,” asoy sa tinubdan sa ESPN.com. “There is nothing that can be done to stop it “because the “B” sample test result has not yet been disclosed.”