Donaire kuwang og bilib sa iyang umaabot nga kontra

GIANGKON ni Nonito Do­naire nga adunay maayong abi­lidad si Cuban Guillermo Rigondeaux apan alang sa gita­wag og “The Filipino Flash,” nag­kinahanglan pa kini’g dugang kasinatian.

Mao kini ang gipabuhagay ni Donaire sa media conference sa umaabot nga panagharong nila ni Rigondeaux kagahapon sa Times Square sa New York.

Gikatakdang magsangka si­­la si Donaire ug Rigondeaux sa usa ka unification bout karong Abril 13 sa New York.

Aduna sab gyu’y punto si Do­naire gumikan si Rigondeaux, kinsa maoy tag-iya sa World Boxing Association (WBA) super bantamweight title, igo ra mang naggunit og 11-0, 8KOs.

Si Donaire, kinsa maoy tag-iya sa World Boxing Organization (WBO) ug International Boxing Federation (IBF) super bantamweight titles, naghupot og 31-1, 20KOs nga rekord.

Gipasabot ni Donaire nga wala unta sa iyang mga plano ang pagpakig-away kang Rigondeaux apan tungod kay mao man kini ang nahan-ay, iya na lang sab kining sagubangon.

Apan ang manager ni Rigondeaux nga si Gary Hyde mibahad kang Donaire nga matangtangan gyud kini og korona.

“Nonito has been avoiding a confrontation with Rigondeaux and he is saying he is not on his radar. Nonito, I can tell that you are on Rigondeaux’s radar and on the 13th of April, he will beat you and get your titles. Then he will enter the sport’s pound-for-pound top 10,” asoy ni Hyde sa www.boxingscene.com.

Gipasabot ni Donaire nga wala ra niya hatagi og gibug-aton ang bahad ni Hyde sa rason nga natural lang nga mosalig gyud ang usa ka manager ngadto sa iyang boksidor.

“I respect Gary Hyde’s comments earlier on that radar hype. I say Rigondeaux is a great fighter but I believe he still needs experience and he had to prove that on April 13,” batbat ni Donaire.

“Their team believes in their fighter and I believe in myself so it will be a great fight.”