NAHAN-AY na ang tanan alang sa pagpahigayon sa 5th leg sa MS Motosuit Motocross Series nga giuolohan og 2014 Calambua Motocross Challenge.
Ang kompetisyon gikatakda karong Oktubre 5 sa gipanindot og maayo nga Calambua race course sa lungsod sa San Remigio, Cebu.
Kapin sa 100 ka riders gikan sa nagkalainlaing dapit sa nasod ang mopakita’g askyon sa kulbahinam nga kompetisyon nga gisuportahan sa Yamaha Motor Philippines pinaagi sa Sales and Marketing Director niini nga si Kaoru Ogura.
Nagkanayon ang nagpasiugda sa kalihukan nga si Cebu motocross patron Lou Ornopia nga mapasalamaton siya sa suporta sa Yamaha kay tungod niini, mas dako ug mas nindot nga lumba ang iyang gilaumang mahitabo.
Si Ornopia, kinsa kanhi Sportsman of the Year awardee, midugang nga daghang dekalidad nga riders ang mangapil sa lumba.
Lakip na niini sila si Jon-jon Adlawan, Dongkey Sanchez, John Flores, Jubenile Abellar, Windsor Famorca sa Guimaras, ug Scott Remy sa Dumaguete.
Daghang riders gikan sa Sel-J Racing Team sa Manila ug uban oang dapit sa Visayas ug Mindanao ang manulong.
Ang mga kategoriya nga kombatihan mao ang mini 60cc, 85cc, beginners, local enduro, open enduro, executive A, B ug C, novice, intermediate, expert ug pro open.
Ning higayuna, nagkanayon si Ornopia nga aduna siya’y idugang nga duha ka bag-o ug espisyal nga mga kategoriya.
Nagkanayon si Ornopia nga makalingaw kaayo kining maong bag-ong mga kategoriya ug nagtuo siya nga kanunay na unya kining atangan sa mga rider sa magsunod nga lumba series.
Gawas sa Yamaha, ang lumba giabagan sab sa JCO Motor Parts, CST Motorcycle Tire, Mobil Oil, F & FO Motor Parts, RMO Motor Parts, New MS Apartelle, Prospeed, Motomaze, Ljun Motorparts, N Style Motor Parts, ug Speed-up Motor Parts.
Sa laing bahin, ang CCTN channel 47 mopasalida og kulbahinam nga mga aksyon sa motocross matag Sabado sugod sa alas 10:00 sa buntag.
Aduna kini replay matag Dominggo sa alas 10:30 sa gabii.