KON si Dondon Hontiveros ang pangutan-on, angayang mosalmot ang Gilas Pilipinas sa umaabot nga FIBA Olympic qualifying tournament diin tulo ka mga luna alang sa 2016 Rio Olympics ang puwedeng makuha.
Ang Gilas Pilipinas wala nakaabante og deretso sa Rio Games human sila napakyas sa championship game sa bag-uhay lang nahuman nga FIBA Asia Championship batok sa host China, 67-78.
Hinuon ang Gilas Pilipinas aduna pa’y poruhan nga makaduwa sa Rio pinaagi sa mas tungason nga FIBA Olympic qualifying nga ipahigayon sa sunod tuig, buwan sa Hulyo.
Apan ang nagsuporta sa Gilas Pilipinas nga mao ang Samahang Basketbol ng Pilipinas (SBP) dili interesado nga paduwaon ang Gilas Pilipinas ning maong kompetisyon.
Mismong si SBP president Manny Pangilinan ang nipabuhagay nga wala na’y dakong makuha ang Gilas Pilipinas sa torneyo gumikan sa ka lisod kompetisyon.
Apan lahi ang panglantaw sa 38 anyos nga si Hontiveros, kinsa produkto sa University of Cebu (UC) Webmasters ug kasamtangang nagduwa sa Alaska Aces sa Philippine Basketball Association (PBA).
“Nindot ni nga tournament para sa next Gilas. Akong gipasabot nga next Gilas katong atong younger players nga makaduwa sa national team in the future,” pasabot ni Hontiveros.
Lakip sa mga gipangtumbok ni Hontiveros mao sila si Bobby Parks Jr., Kobe Paras, Keifer Ravena ug ang Fil-Am nga kasamtangang sakop sa Los Angeles Lakers sa National Basketball Association (NBA) nga si Jordan Clarkson.
“By that time, for sure, makaduwa na si Clarkson ana. Nindot ni nga tournament para sa atong younger players. Dako kaayo ni nga exposure para nila,” dugang ni Hontiveros.
“Siyempre kon makaduwa na ka og world tournament, inig balik nimo’g duwa sa Asia mas maayo na gyud ka. Ang exposure ani maoy importante.”
Sa FIBA Olympic qualifying, ikaharong sa Gilas ang ubang lig-ong teams sa Europe ug uban pang parti sa kalibutan.