TAAS og panglantaw si Danny Ildefonso sa 13-anyos nga si Kai Sotto kinsa ubos na kini karon sa iyang pag-amoma isip usa sa mga big man coach sa Ateno juniors basketball team.
Human sa paggahin og igong panahon alang sa iyang duha ka anak nga sila si Shaun ug Dave, ang usa sa giilang PBA greats ang gitahasan karon nga maoy mogiya sa nga batan-on apan may igong gidak-on sa Blue Eagles nga naglaki kang Sotto kinsa sa iyang kabata mitangkod na og 6-9 ang gitas-on.
Ang nakapaikag ni Ildefonso ni Kai dili lang kay ang gitas-on niini kon dili ang attitude ug ingon man kadali nga tudloan niini.
“Ang maganda sa bata, mataas ang IQ sa basketball. Maganda ang attitude nung bata,” matod ni Ildefonso, kinsa nakauban sa amahan ni Kai nga si Ervin sa dihang nagduwa pa sila sa San Miguel.
Hinuon alang kang Ildefonso nga nagkinahanglan nga paabuton sa tukmang panahon ang pagpanako unya sa kalawasan ni Sotto kay sa iyang kabata ug kataas dako pa kaayo kini og kinahanglan aron makadominar sa ilawom nga bahin.
“Antayin na lang talaga natin lumaki ang katawan,” ingon Ildefonso.
Si Ildefonso mao usab ang nag-ugmad sa Sugboanong higanti nga si June Mar Fajardo sa dihang kauban pa sila sa San Miguel Beer.
Sa iyang pagkasakop karon sa Ateneo, si Ildefonso andam usab nga motudlo sa ubang mga dagko sa Ateneo.
Si Sotto maoy nahimong most valuable player sa bag-o lang natapos nga Jr. NBA Training Camp samtang ang Sugboanon nga si Florence Jill Talas mao usab ang MVP sa Jr. WNBA category.
Laing Sugboanon nga nadala usab sa Jr. WNBA All-Star team si Darlien Ragasajo, kauban ni Talas sa Abellana National School.
Sa laing bahin, pormal nga gitudlo nga headcoach sa University of the Philippines si Bo Perasol.
Si UP chancellor Michael Tan maoy opisyal nga mitudlo ni Perasol sa maong position, kagahapon, duha ka adlaw sa dili pa sugdan ang Filoil Flying V Preseason Premier Cup. JBM/Spin.ph