Amonsot daog, gusto og world title fight | SunStar

Amonsot daog, gusto og world title fight

Time to read
1 minute
Read so far

Amonsot daog, gusto og world title fight

Monday, March 20, 2017

Amonsot. Ang kanhi sakop sa inilang Ala Boxing Gym nga si Czar Amonsot (tunga), lumad nga taga Bohol, ug promoter nga si Brian Amatruda (tuo) sa Australia uban sa round girl human sa iyang away sa niaging adlaw didto sa Melbourne Pavillion, Flemmington, Australia. (Tampo nga hulagway)

MINNEAPOLIS – World title fight maoy anaa karon sa alimpatakan ni Australian-based Boholano boxer Caesar Amonsot (34-3L-3D, 22KO) human kini mipakamang sa ikawalo ka round sa Hungarian boxer nga si Zsigmond Vass (12-5, 2KO) atol sa ilang away sa niaging adlaw sa Melbourne Pavillion, Flemington, Victoria, Australia.

Si Amonsot, kanhi sakop sa ALA Boxing Gym sa Sugbo ug lumad nga taga Tagbilaran City, Bohol apan nagbase na sa St. Kilda, Victoria, Australia nakadepensa sa iyang interim WBA Oceania Lighwelterweight belt.

Sa pakighinabi via online chat sa SunStar Superbalita- Cebu si Amonsot nagkanayon nga anaa na siya sa saktong edad busa world championship na iyang rumbo karong panahona.

“Ambot lagi kanus-a ko kadula og world title ani sir gikapoy nko gukod sa swerti,” batbat sa 31 anyos ug walhon nga boksingero.

Kini ang ika-16 nga sunodsunod nga kadaugan human siya napildi pinaagi sa unanimous decision ni Australian Michael Katsidis sa Las Vegas niadtong 2007.

Si Amonsot rated # 5 sa WBA ug gigiyahan ni Australian trainer Rey Giles ug sa manager/promoter Brian Amatruda.

Walay plano si Amonsot nga moretiro, gani gusto niya’ng ilugon ang bakus ni British WBA Lighwelterweight champion Ricky Burns (41-5-1D, 14 KO) ug bisan elimination fights sa rated no. 1 hangtod no. 6 boxers apan mag depende kining tanan sa iyang promoter.

Gipatik sa mantalaang Superbalita Cebu Marso 21, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments