NATANGTANGAN man tuod siya sa bakus human wa makakuha sa iyang timbang, apan pabiling determinado si kanhi world champion Marlon Tapales nga makalangkat og laing titulo sa umaabot nga mga adlaw.
Si Tapales, ang kanhi WBO world bantamweight champion napakyas sa pagdepensa sa iyang titulo batok ni Shohei Omori niadtong Dominggo sa dihang misobra ngadto sa 119.93 lbs. ang iyang timbang nga imbis sa 118 lbs. ang ilang awayan.
Giangkon ni Tapales nga naglisod ug dili na gyud niya madala pa ang 118 lbs. ug kinahanglan nga mosaka na siya sa iyang timbang ngadto sa 122 lbs.
Ang iyang titulo nabakante karon sanglit iya mang na-knockout ang challenger nga si Omori sa ikanapulo ka round.
Nangayo siyag pasaylo ngadto sa iyang mga tigsuporta, apan mipasalig nga mobalik siyag saka sa ring nga ning higayona sakto na sa kabaskog ug andam na usab nga molabni og kampyonato.
Hinuon nagkinahanglan pa og mga pipila ka mga away si Tapales sa dili pa siya moaway og mga boxer nga dunay dagkong pangalan sama nila ni Cesar Juarez, Magdaleno ug uban pa.
Niabot sa Pilipinas si Tapales uban sa iyang manager nga si Wakee Salud niadtong Lunes human sa ilang away nianang Dominggo sa gabii.
Gitug-an ni Tapales nga nasagmuyo man tuod siya sa pagtangtang sa iyang korona apan sa samang higayon nahagit siya sa paglangkat og laing korona. Hinuon gihapon mosuporta ni Tapales ang iyang manager nga si Rex "Wakee" Salud.