Mandaue, Consolacion gilauman nga mag-abot sa North finals series

NAPAMATUD-AN og balik sa Mandaue City nga kaya nilang moduwa ug depensa pinaagi sa pagpukan sa host Bogo City, 63-56, sa usa ka low-scoring nga kombati sa North Division Quarterfinals sa 2017 Cebu Governor’s Cup Inter-cities/Municipalities basketball tournament sa miaging gabii sa Don Celestino Martinez Sports Complex sa Bogo City.

Sa laing mga duwa, gipanglampornas sa Consolacion Sarok ang Bantayan Seamasters, 107-88, samtang gipang buntog sa Tuburan ang Balamban, 94-84.

Ang Mandaue ug Consolacion pulos wala pa’y pilde sulod sa tulo ka mga duwa ug miamag na ang esena nga sila ang magharong sa North Division finals.

Gamit ang ilang hugot nga depensa, nalimitahan sa Mandaue og siyam lang ka mga puntos ang Bogo human sa 1st quarter.

Hinuon ninggukod ang Bogo ug nailog niini ang labaw, 32-30, sa halftime.

Nagpabiling sikit ang panagsangka sa 3rd quarter apan pinaagi sa ilang depensa, ang Mandaue nakabiya sa Bogo sa 4th quarter ug ning higayuna, deretso na sa kadaugan.

Gipangulohan ni Jancork Cabahug ang Mandaue pinaagi sa iyang 20 puntos samtang nihatag og 11 puntos si Isabelo.

Ang Bogo gipangulohan ni Paul Amistoso pinaagi sa iyang 16 puntos samtang niamot og 10 puntos si Justine Valenzuela.

Ang Bogo, Tuburan ug Bantayan parehong naghupot og 1-2 nga rekord samtang ang Balamban adunay 0-3 nga baraha.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph