GIPAKAGING sa Dalaguete AgriSaurs ang host ug inilog nga Talisay City Aqua Stars, 80-79, sa nagpadayon nga 2017 Cebu Governor’s Cup Inter-Cities/Municipalites Basketball tournament nga gipahigayon sa Talisay City Sports Complex.
Ang kadaugan sa Dalaguete naghatag kanila og kahigayonan nga makasulod sa semifinals round samtang ang Talisay hingpit na nga miawop ang ilang paglaom alang sa sunod round tungod sa 1-3 nga baraha.
Hinuon malisod nga tahas ang sagubagon sa Dalaguete sanglit ila mang ikaatbang ang lig-on nga Toledo City alang sa inilogay sa katapusang luna sa finals sa South Division.
Sa sayo pa, padayong nangutlo og kadaugan ang Minglanilla Stars pinaagi sa paglubong sa Samboan, 100-59.
Ang Minglanilla ubos ni coach Edito Salacut ug sa team manager nga si Mikey Oberes, pabiling wala pay pildi sulod sa upat ka duwa sa quarterfinals ug nakasiguro na og puwesto sa semifinals south.
Tapuson sa Minglanilla ang ilang quarterfinal games ugma batok sa Barili sa alas 6:30 sa gabii didto sa Dalaguete Sports Complex sa dili pa ang panag-engkuwentro sa host Dalaguete ug Toledo City nga pulos adunay 3-1 nga baraha.
Karong gabii, ang luna alang sa North Divison finals maoy target sa Mandaue City ug sa Consalacion Sarok Weavers ni coach Leo Casinillo sa dihang ilang ikasangka ang tagsatagsa ka mga kaatbang sa Consolacion Municipal Gym.
Sa alas 6:30 sa gabii, ang Mandaue makigsangka sa Bantayan samang ang Sarok Weavers maoy mo-host sa Balamban sa alas otso sa gabii. JBM, RCM